Сумар дня на 14. грудня/децембра 2020 р.

Приносиме вам сумар медияльной ґрупы ЛЕМ.фм+ на ден 14. грудня/децембра 2020 р.

Сме Русины

В тых днях на Словациі проходит інформацийно-презентуюча кампанія пн. «Сме Русины». Стоіт за ньом Округлый Стіл Русинів Словациі і Русиньска Оброда на Словациі. До кампаніі долучают і партнерскы орґанізациі в дальшых державах, де жыют Русины. Дотля сут то: орґанізация Rusíni.cz і Общество Приятелів Підкарпатской Руси, котры діют в Чешскій Республиці, орґанізация Руска Бурса в Ґорлицях з Польщы, Руска Лиґа і Нацийональный Совіт Русинів з Сербіі, Дружство Руснак з Хорвациі. Дальшы партнеры з інчых держав мали бы долучыти в найблизшых днях. Русины вказуют свою єдніст. Кампанія має на ціли ословити Русинів, особливо молоду ґенерацию, жебы продолжали тото, што ім было передане од предків, в чым были выхованы, особливо в часі кєд ся не мусят ганьбити свого походжыня ани бояти репресий з причыны того, кым сут. Тым, же до кампані прилучают ся орґанізациі з ріжных держав, Русины вказуют, же сут, наперек тому, же жыют в інчых державах, єдным неподільным народом. В рамках кампаніі зрыхтувано вельо акций. В сіти фейсбук доступны сут профільовы рамкы з написом Сме Русины. На фанпейджы Русинів Словациі сут публикуваны фільмы вызначных особности з ріжных обшыри жытя – культуры, політикы, наукы, котры гордо голосят ся ґу свому русиньскому походжыню. Приготовлены сут і ріжны банеры, більборды, на котрых так само знаны люде будут презентувати госло кампаніі. Цілю кампаніі є шырыти інформациі о Русинах не лем медже Русинами, але і серед більшости, што мало бы вклад в збільшыня толеранциі медже нацийональностями не лем на Словациі, але і в інчых державах, в котрых буде проходила кампанія.

Публична колекта на знищену пожаром церков

Інформували сме уж, што 28. жолтня/октобра тр. в пражскій Загороді Кіньскых згоріла памяткова русиньска церков св. Михаіла Архістратига. Церков была памятково хороненым обєктом з ХVII ст. Храм зо села Великы Лучкы на Підкарпатскій Руси перенесли до Прагы в 1929 р., вчас І Чехословацкой Республикы, жебы стал ся він частю збірок Народописного Музею. Цілю обновити знищену пожаром церков, Маґістрат Міста Прага выголосил публичну колекту. Од єй выголошыня, тє. од початку листопада/новембра, люде назберали уж веце як мілийон чешскых корон. Збірка має тырвати до 4. листопада/новембра 2021 рока. Актуально ведена є документация знищынь в формі скану 3D, пак має пройти консервация, котра буде хоронила части, якы ся сохранили. В найблизшых тыжнях, подля порталю iRozhlas.cz, одбуде ся координацийна стріча представників столиці з православным духовным храму, на котрій буде ся рішала спілпраца ци поміч з інвентаризацийом і обновом інтерєру. До того часу незнаный є цілковитый кошт реконструкциі церкви.

«Малопольща поза втертым шляком» – конкурс

Малопольскє воєвідство просит вшыткых представників туристичной бранжы в Малопольщы до участи в посліднім етапі конкурсу пн. «Малопольща поза втертым шляком». До выграня дармова реклямова кампанія туристичной оферты на цілу Польщу. Жебы взяти участ в конкурсі, треба перше долучыти до фейсбуковой ґрупы конкурсу, а пак опубликувати гын пост описуючый туристичну оферту, яка была створена во спілпрацы з єдным або парома підметами діючыма в Малопольщы. До опису треба доличыти фотоґрафіі або фільм. Цілю конкурсу є найти атракциі, якы ся не находят на тзв. «головных шляках», вкрыту красу Малопольщы. Зголошувати ся до конкурсу мож лем до заране, тє. 15. грудня/децембра. Полный реґулямін можете найти на фейсбуковым фанпейджы Малопольщы.

Выстава іконового малярства в Коросні

Од 9. грудня/децембра тр. до 6. лютого/фебруара 2021 р. в Коросняньскій Публичній Бібліотеці доступна є выстава іконового малярства Барбары і Збіґнєва Мархевків. Одкрытя выставы з огляду на ограничыня звазаны з пандемійом не прошло в традицийній формі. Выступліня авторів выставы є доступне на профіли бібліотекы в сервісі YouTube. Артисты захопили ся іконом завдякы богатій сакральній спадковині Лемків на обшыри Низкого Бескіду, як тіж контактам з бєщадскыма артистами. Выставу мож обзерати і онляйн на сайті Короснянской Базы Реґіональной Інформациі.