Сумар дня на 9. грудня/децембра 2020 р.

Приносиме вам сумар медияльной ґрупы ЛЕМ.фм+ на ден 9. грудня/децембра 2020 р.

І на заході упамятнили Ден Русинів в Польщы

5. грудня/децембра члены Кружка Стоваришыня Лемків в Любіні упамятнили нацийональне свято Лемків – Ден Русинів в Польщы, спільном молитвом за покійного Богдана Ґамбаля. По Божескій Літургіі, одслуженій 4. грудня/децембра з нагоды Дня Копальника в православній церкви св. Тройці в Любіні, члены стоваришены в любіньскым кружку стрітили ся довєдна, штобы спомнути на лемківскы справы, історию та теперішні часы. Пак пішли на любіньскій цмонтір, де похороненый єст Богдан Ґамбаль, долголітній ведучый Стоваришыня «Руска Бурса» в Ґорлицях і думкодавця основаня першого лемківского радия ЛЕМ.фм. Ґамбаль был так само долгы рокы членом як раз любіньского Кружка СЛ, з котрого – як делеґат – был участником вельох конґресів. Богдан Ґамбаль як першый в Польщы розпропаґувал ідею празднуваня Дня Русинів.

Ліпшы желізницьовы получыня в обшыри Мідьового Басену

В будучым році буджет нижньошлезского воєвідства вынесе веце як 1,26 млд зл. Векшіст той квоты буде презначена на реґіональный транспорт і дорогово-желізницьову інфраструктуру. Серед плянуваных інвестиций є опрацувати студиюм выкональности побудуваня новой желізницьовой леніі з Любіна через Польковиці до Ґлоґова при єдночасній розбудові леніі но 289 Ліґниця-Рудна Ґвізданів. В проєкті буджету Нижнього Шлеска нашла ся іщы інча пропозиция для жытелів Мідьового Басену, є то ревітализация желізницьовой леніі на одтинку Хойнів-Рокыткы-Хоцянів-Дунінів. Звязаны з тым роботы мали бы ся скінчыти уж в 2022 р. На заранішній сесиі проєкт буджету буде представленый воєвідскым радникам.

В Лабовій новы інвестициі

Завдякы дотациям з Евросоюзу будут реализуваны в Малопольщы черговы проеколоґічны проєкты, м.ін. в селі Лабова на західній Лемковині. Догваріня, ґарантуючы дофінансуваня проєктів, были переданы маршалком Малопольщы Вітольдом Козловскым вчас стрічы 4. грудня/децембра з бенефіциєнтами в Кіні Сокіл в Старым Санчы. Серед них находит ся, як споминано, ґміна Лабова. Унійне дофінансуваня высокости веце як 680 тис. зл дозволит сфінансувати част коштів термомодернізациі двох будинків в ґміні, а то Уряду Ґміны і Основной Школы. Будинкы будут м.ін. отеплены, поміщена буде фотовольтаічна інсталяция, енерґоощадне освітліня. Додатково, в школі змодернізуют систем центрального огріваня, вымінят выгляды. Догваріня з рук маршалка одобрала війт ґміны Лабова Марта Слабый.

Місто Ґорлиці зо знаком якости

Місто Ґорлиці остало лавреатом конкурсу пн. «Знак Якости Социяльной і Солідарной Економіі 2020» орґанізуваного Міністерством Родины і Социяльной Політикы. Капітула конкурсу признала місту І місце в катеґориі Социяльні Одповідальный Самоуряд. Ґорлиці доцінили за підтримуваня социяльной економіі, пропаґуваня ідеі спійности і социяльной солідарности. З огляду на епідемію оголошыня результатів конкурсу прошло вчас відеоконференциі. Минулого рока місто было лавреатом конкурсу Малопольскій Лідер Социяльного Підприємства в катеґориі Самоуряд Приязный Социяльній Економіі, што подля слів бургомайстра Ґорлиц Рафала Куклі, є доказом на тото, же місто іде в добру страну. Окрем цертифікату «Знак Якости Социяльной і Солідарной Економіі 2020» Міністерство передвиділо предметовы нагороды для лавреатів в формі выпосажыня звязаного з веденом через нагородженого діяльністю та в формі награня промоцийного фільму.

Фот. Місто Ґорлиці.