Сумар дня на 8. грудня/децембра 2020 р.

Приносиме вам сумар медияльной ґрупы ЛЕМ.фм+ на ден 8. грудня/децембра 2020 р.

Стежка в коронах дерев в Старым Санчы

В Старым Санчы на Містецкій Горі тырват будова стежкы в коронах дерев. До той поры поставлено столпы, што підтримуют конструкцию. Тепер єден з найтяжшых етапів проєкту – монтаж підтрумуючых части. Вшытко проходит в густым лісі з лем єдном убитом дорогом. Медже деревами ґрунт єст мягкій, зато кажде уставліня тяжкого нарядя мусит быти докладне – што до центиметра. Цілый поміст рахувал буде 218 м, а в найвысшым пункті найде ся аж 18 м над земльом. Стежка зроблена буде по части з дерева, а в некотрых місцях зо шкла, што дозволит на обзераня природы одгоры. В місцях, де траса вела буде близко землі, замонтуваны будут гамакы і мосты, котры дадут можливіст роблячым прогулькы одпочати. Окрем того на стежці найдe ся тіж мультімедияльне ґратя, што дозволит дознати ся дачого о істориі міста Старый Санч і о находячій ся гев фауні і флорі. Кошт інвестициі то 6 млн, з чого більше як половина походит з дофінансуваня для Гміны Старый Санч з Европейского Фонду Реґіонального Розвитку «Інерреґ Польща Словация». Пляново працы мают ся закінчыти в червци/юнію 2021 рока. Конструкция буде достосувана до потреб непелносправных осіб, а вступ на трасу буде дармовый.

Гондольова видокова желізниця над запором в Солині

Нова атракция в Бєщадах уж потверджена. Гондольова видокова желізниця над запором в Солині штораз близше возникніня. Польска Ґондольова Желізниця підписала догваріня з Ґміном Солина на реализацию інвестициі. Підписаня догваріня кінчыт конкурсовый етап і помалы приближат інвесторів і урядників будовы. Тепер зачали старати ся о дозволіня на будову та глядати выконавцю цілого проєкту. Польска Ґондольова Желізниця то єден з найстаршых операторів желіжниц і гірскых вытягів. Сут властителями м.ін. желізниці на Каспровый Верх ци Креницку Яворину. Згідно з запропонуваном рік тому концепцийом, інвестиция над запором в Солині буде зреализувана до кінця 2022 рока.

Єпископска хіротонія та інґрес єпископа Аркадия Трохановского

В остатнім часі інформували сме о покликаню третьой грекокатолицкой єпархіі на териториі Польщы. Владыком новой ольштыньско-ґданьской єпархіі был выбраный о. Аркадий Трохановскій, дотеперішній парох в Валчы, в старій вроцлавско-ґданьскій єпархіі, а катедром новой єпархіі буде місто Ольштын на Варміі. Єпископска хіротонія та інґрес єпископа Аркадия Трохановского пройдут 23. січня/януара 2021 рока в катедрі Опікы Святой Богородиці в Ольштыні.

XXXVII Ґорлицкі Салон

Припоминаме же лем до 15. грудня/децембра можна складати своі артистичны роботы на шторічну выставу Ґорлицкого Плястичного Середовиска. До участи прошены сут прожываючы на обшыри Ґорлиц непрофесийональны артисты. Як што рока конкурсова капітула спосеред участників выбере лавреата і признат нагороду Міста Ґорлиці ім. Альфреда Длуґоша. Складаны роботы мусят сполняти пару вымогів, м.ін. не можут быти презентуваны на попередніх выставах «Горлицкого салону» і возникли протягом остатніх двох років. Описаны працы треба донести до Ґалериі Штукы «Двір Карвациянів». Термін одкрытя выставы «XXXVII Ґорлицкого Салону» буде поданый в найблизшым часі.

Вмер поета Йосиф Іванович

На конец смутна інформация, вмер поета Йосиф Іванович Лемко. Артиста вродил ся 13. серпня/авґуста 1937 рока на Підкарпатскій Руси в селі Хуста. Служыл в войску, был учытельом і працувал в «Хыжы художественного творчества профсоюзів». Нагородженый медалями «Ветеран труда» і «Знак пошаны». Ціле жытя анґажувал ся соспільне жытя Русинів, был м.ін. членом президіі Народной Рады Русинів Закарпатя і Союзу Русиньскых Писателів Закарпатя. Был двараз лавреатом літературной преміі ім. А. Павловича. Автор поетицкых збірок «На сивых крылах горлиці», «Отча земля», «Небо і земля- жытя моє» і вельох інчых.