Сумар дня на 7. грудня/децембра 2020 р.

Приносиме вам сумар медияльной ґрупы ЛЕМ.фм+ на ден 7. грудня/децембра 2020 р.

Ден Русинів в Рускій Бурсі в Ґорлицях

В суботу, 5. грудня/децембра, одпразднували сме Ден Русинів в Польщы, якій схваленый был Світовым Конґресом Русинів на памятку основаня Руской Народной Республикы Лемків. З той нагоды прошла в будинку Руской Бурсы в Ґорлицях презентация новой публикациі пн. «Перша ліґа парібків» з публицистичныма текстами Ваня Гунянкы, Петра Медвідя і Богдана Ґамбаля, выдавцьом котрой є Стоваришыня «Руска Бурса» в Ґорлицях. З огляду на епідемічну ситуацию і звязаны з ньом рестрикциі подія была заперта для публикы, мож єй было єднак видіти на фанпейджы радия ЛЕМ.фм або слухати трансмісиі на антені радия ЛЕМ.фм. Тоты, котры іщы не виділи трансмісиі, можут єй фурт найти на фанпейджы нашого радия. Презентувана публикация вказала ся на выдавничым рынку завдякы стараням Богдана Ґамбаля, вызначного лідера русиньского соспільства, якій несподівано одышол з того світа 2. липця/юлия 2020 р. Нич зачала ся суботня презентация книжкы, ведуча Руской Бурсы Наталия Малецка-Новак, поінформувала, што Богдан Ґамбаль был посмертно одзначеный Золотым Крестом Заслугы за свойу выдатну діяльніст на розвиток лемківской культуры і достоменности в Польщы. З огляду на обовязуючы рестрикциі, офіцияльна подія была перенесена на будучый рік. По «Першу ліґу парібків» просиме до Руской Бурсы.

Початок лыжного сезону

В горах зачынат ся уж лыжный сезон. Своі стациі одкрыли уж осередкы м.ін. в Тыличы, Гыровій ци Верхомли. На трасах лежыт до піл метра снігу, а рух єст покля што невеликій. Туристів обовязуют ограничыня спричынены епідемічном ситуацийом. Обовязує наказ закрывати ґамбу і ніс. В чергах треба тримати найменше пілметровый дистанс. Ліміт осіб не обовязує на вытягах в припадку, коли місця будут занимати особы маючы спільный нічліг, або якы разом пришли до стациі. Осередковы реставрациі згідно з ограничынямi оферуют лем ідло «на вынос». О тыжден плянуют одкрыти наступны лыжны осередкы, м.ін. буде то Креницка Яворина.

Новый будинок поліциі в Устю Рускым

В Устю Рускым ставляют новый будинок поліциі. Тот, в якым актуально містит ся устяньска поліция, єст мешкальным будинком побудуваным в 1974 році і заадаптуваным на потребы поліциі. Подля пресового офіцера Повітовой Коменды Поліциі в Ґорлицях Ґжегожа Щепанка, актуальный будинок не сполнят вымогів, а його ремонт не мал бы економічні сенсу. З той причыны буде він збуреный, коли завершена буде будова нового будинку, а на його місци буде зробленый паркінґ. Новый будинок поліциі был запроєктуваный для 18 поліциянтів. Будинок має быти вполни пристосуваный до обслугы неполносправных осіб. Кошт інвестициі то близко 5 млн злотых, якы походят з проґраму модернізациі поліциі. Завершыня робіт єст плянуване на будучый рік.

Фінісаж выставы «Преображыня | Юрий Новосільскій, Леон Тарасевич»

Презентация выставы «Преображыня | Юрий Новосільскій, Леон Тарасевич», о котрій сме перше інформували, буде одкрыта долше, до 27. грудня/децембра 2020 рока. Завершыня выставы пройде в віртуальній формі. Буде оно получене з промоцийом публикациі, яка місит в собі тексты, тыкаючы творчости обох артистів. Авторами текстів сут др Кристина Черні, Енді Роттенберґ і о. Константин Бондарук. В каталоґу находит ся і фотоґрафічна документация выставы авторства Ґжеґожа Домбровского. 20 грудня/децембра о год. 18.00 Фундация Villa Sokrates і Музей Ікон в Супрашли, якы сут спілорґанізаторами проєкту, выемітуют материял тыкаючый промоциі каталоґу і фінісажу выставы.