Од 13. грудня/децембра новый розклад руху потягів

Як што рока в Польщы, але і вшыткых европейскых державах, одбуде ся зміна розкладу ізды потягів. Штоправда, уж од парох років навчены сме, же в PKP є то кус частійше, розклад змінят як в калейдоскопі, але то од той грудньовой зміны вводит ся дальшы (а од тіж і наступны…). Зато вказуєме гев годины одіздів обовязуючы од 15. грудня/децембра до 13. марця 2021 рока, і не береме ниякой одповідальности за тото, ци потяг приіхат. І так ся спізнит. PKP то по нашому ПДЖ… Потях доіжат, ждийте 🙂

Для ясности – вшыткы номеры трактів сут подля Сітьового Розкладу Ізды Потягів, якій выдают PKP Polskie Linie Kolejowe S.A.

Потягы на Лемковині

Тракт 130 Тарнів – Санч – Мушына – Крениця/Попрад (Словация)

На тій трасі будут ходити потягы трьох перевозників – особовы Polregio і Малопольской Желізниці і поспішны PKP Intercity.

З Крениці будут курсувати штоденні штырі особовы потягы, з чого три підут безпосередньо до Кракова – першый, котрый ся зове Никыфор, одіхат о год. 5.10, а до Кракова приіхат 9.26 (приспішеный медже Креницьом а Санчом); другій одіхат о год. 14.04, приіхат о 18.27 (приспішеный медже Креницьом а Санчом); третій – о. 17.13, п. 21.33 (приспішеный медже Санчом а Краковом); а єден о год. 12.16 поіхат лем до Тарнова, де буде о 15.29. Окрем тых, будут іздити три потягы з Мушыны до Тарнова, першый од понеділька до суботы окрем свят – о. 5.55, в Тарнові о год. 8.54; другій штоденні – о. 9.25, п. 12.19; а третій – о. 14.58, курсуючый од понеділька до пятниці окрем свят, поіхат аж до Кракова, де буде о год. 19.38. З Пивничной поіхат потяг през Санч і Тарнів до Богумиловиц (в неділю лем з Санча, о. 5.28). З Санча до Кракова поіхают рано два потягы (о. 3.43 і 4.34) і єден пополудни о год. 16.11, в Кракові буде о 19.38. О год. 14.24 в неділі поіхат потяг з Санча до Ясла през Ґорлиці Загіряны – 15.33, і Ґорлиці – 15.49, в Яслі буде о 16.41.

В другу сторону, з Кракова до Крениці, потягы одіхают о год. 5.30, 7.30 і 16.45 і приіхают о год. 10.07, 16.56, 21.15 (вшыткы приспішены до Санча). З Тарнова до Крениці о год. 13.35. З Тарнова до Мушыны штоденні о год. 4.23 і 15.34 од понеділька до пятниці і в неділю окрем декотрых дни перед святами. З Кракова – о. 4.10, до Пивничной – п. 8.05, од понеділька до пятниці окрем декортых свят, з Бугумиловиц до Пивничной – п. 10.27, през Тарнів – о. 8.01, штоденні і з Тарнова – о. 20.06, до Пивничной – п. 22.22, в суботу лем до Санча – п. 21.51. З Кракова до Санча поіхают два потягы, о год. 15.43 і 20.08, приізд до Санча о 18.42 і 23.31. В пятницю поіхат потяг з Ясла – о. 21.50, до Санча – п. 23.42.

Окрем того, буде курсувало вісем пар потягів медже Санчом і Пивничном, од понеділька до пятниці, в святочным періоді єдна пара потягів поіхат з Пивничной аж до Бобовой, єден потяг з Санча до Мушыны. Єдна пара поіхат штоденні.

З Крениці поіхают три поспішны потягы:

1. IC Малиновскій, котрый буде курсувал в суботу і неділю і декотры свята. Выізджат з Варшавы Центральной о год. 5.25, з Кракова Головного о 8.54, в Санчу буде о 11.30, в Креници о 13.04. До Варшавы поіхат о 15.10, з Санча 16.53, в Кракові буде о 19.43, а в столици о 23.10.

2. ІС Малопольща выіхат штоденні з надморской Ґдыні о год. 5.10, з Варшавы Центральной о 9.24, з Кракова Головного о 13.36, в Санчу буде о 16.18, в Креници о 17.47. До Ґдыні поіхат о 10.37, з Санча 12.06, в Кракові буде о 14.46, в Варшаві Центральній о 18.53, а в Ґдыні о 22.53.

3. TLK Погіря выіхат з Вроцлавя Головного штоденні о год. 23.19, до Санча приіхат о 7.08, а в Креници буде о 8.36. З Крениці поіхат о 19.14, з Санча о 20.46, а в столици Шлеска буде о 4.51.

Тракт 131 Сторожы – Ґорлиці Загіряны – Ясло – Коросно – Санок – Загіря

През Ґорлиці Загіряны переіхают штоденні два потягы PKP Intercity: TLK Ветлина з Кракова – о. 9.44, в Ґорлицях Загірянах буде о год. 12.03, до Загіря – п. 14.13, і TLK Бещады з Кракова – о. 19.22, в Ґорлицях Загірянах буде о 21.39, до Загіря – п. 23.54. В другу сторону TLK Бещады з Загіря – о. 5.00, в Ґорлицях Загірянах буде о 7.13, в Кракові о 9.30, і TLK Ветлина з Загіря о 14.41, в Ґорлицях Загірянах о 16.53, в Кракові о 19.01. В пятницю поіхат особовый потяг з Ряшова – о. 15.39, в Ґорлицях Загірянах о 17.38, до Ґорлиц – п. 17.45, з Ґорлиц до Ясла о год. 17.55, в Ґорлицях Загірянах о 18.03, в Яслі о 18.43. Тіж лем в пятницю поіхат з Ґорлиц Загірян до Санча о год. 22.34. З Санча о 14.24 в неділі поіхат потяг до Ясла през Ґорлиці Загіряны – о. 15.33, і Ґорлиці – о. 15.49, в Яслі о год. 16.41. В пятницю поіхат особовый Губаль з Кракова – о. 18.06, котрый в Ґорлицях Загірянах буде о 20.41, а в Яслі о 21.21. Верне в неділю о 17.21 з Ясла, в Ґорлицях Загірянах буде о 17.50, а в Кракові о 20.29.

Медже Яслом, Коросном а Саноком особовы потягы будут лем три, з чого два лем в робочы дни. З Санока о год. 6.38 і 15.15 та з Ясла 4.58 i 13.48. В пятницю поіхат Бещадскій Жачок з Ряшова о 16.29, в Яслі буде о 17.51, в Коросні о 18.29, в Саноку о 19.24. Верне в неділю, з Санока о 15.15, з Коросна о 16.23, з Ясла о 16.55, а в Ряшові буде о 18.11.

Медженародне получыня з Лемковины

З Мушыны до Попраду Татер през Плавец і Кежмарок поіхат в зимовы фериі і вакациі двараз на ден потяг Татры. З Мушыны о год. 9.53 і на 11.24 буде в Попраді та о 17.56 і на 19.29 буде в Попраді, в другу сторону выіхают з Попраду о год. 7.32 і 15.18 і будут в Мушыні о 9.10 і 17.01.

На жаль, од нового розкладу не буде курсувал потяг Вояк Швейк, котрый з Ряшова през Ясло, Санок, Команчу і Лупків іхал до Меджелабірців на Словациі.

Чужына

На чужыні, з причыны барз доброй сіткы получынь особовых потягів (Polregio і Нижньошлезской Желізниці), напримір: понад тридцет получынь на ден медже Вроцлавьом а Ліґницьом, з чого десят до Любіна, двадцет єден медже Ґлоґовом а Вроцлавьом (і през Любін, і през Волів), зосередиме ся на получынях PKP Intercity.

Як ходит о медженародны потягы, през Зелену Гору, Ґлоґів, Любін, Ліґницю поіхают два: нічный Найтджет Берлін – Вроцлав – Острава – Відень/Будапешт і денный Вавель з Кракова през Вроцлав до Берліна. Додатково, в вакациі поіхат сезоновый, нічный TLK Волин, з Богумина до Свиноустя през Ополе і Щецін.

Окрем медженародных, през Зелену Гору, Ґлоґів, Любін і Ліґницю поіхают штоденні три внутрідержавны потягы катеґориі IC — Хелмоньскій з Кракова през Катовиці і Щецін до Сниноустя, Матейко з Перемышля през Краків і Катовиці до Щеціна, Мегоффер з Перемышля през Краків і Катовиці до Щеціна і TLK Вычулковскій з Люблина до Щеціна през Кєльці і Ченстохову.

З Болеславця, Хойнова і Ліґниці буде іздил през Вроцлав і Варшаву до Білогостоку: в ден IC Налковска зо Зґожельця (окрем суботы з Білогостоку і неділі зо Зґожельця), в ночы IC Карконошы (з Єленьой Горы, в фериі і вакациі зо Шклярской Порубы).

TLK Конопницка поіхат з Зеленой Горы през Жаґань, Жары, Маловиці, Лешно Выжнє, Рокыткы і Ліґницю, дальше през Вроцлав і Лудзь до Варшавы (окрем суботы до Варшавы і неділі до Зеленой Горы).

През Волів, Сцінаву, Нову Сіль, Зелену Гору поіхат TLK Сварожыц з Вроцлавя до Щеціна (окрем декотрых свят) і TLK Конопницка з Варшавы през Лудзь до Зеленой Горы.

З Ґожова Великопольского през Стшельці Краєньскы Схід і Нове Дрезденко до Кшыжа (на тракті Щецін – Познань) буде курсувало девят пар особовых потягів штоденні (з чого три поіхают до Познаня) i додатково два в робочы дни окрем свят. PKP Intercity урухомит дві пары потягів: TLK Коцєвє з Ґожова до Ґдыні (окрем декотрых свят) і TLK Боры Тухольскы з Костшына до Ґдыні, котры поіхают през Стшельці Краєньскы Схід і Нове Дрезденко, і IC Любушанин з Ґожова през Сквіжыну, Меджеріч, Познань, Варшаву, Люблин до Холма.

Получыня Лемковины з Заходом

TLK Погіря буде єдиным потягом, котрый получыт Чужыну (з Вроцлавя) з Лемковином. Вартат повісти, же буде він скомунікуваный во Вроцлаві з медженародным потягом Найтджет з Берліна до Відня, котрым буде догідно доіхати з Зеленой Горы, Ґлоґова, Любіна ци Ліґниці до Вроцлавя.

На жаль, од нового розкладу в TLK Погіря престає курсувати ґрупа ваґонів з Вроцлавя до Загіря през Ґорлиці Загіряны, Біч, Ясло, Коросно і Санок.

Як іде о подорож з пересідком, то єст добра інформация – штырі потягы на ден получат Зелену Гору, Нову Сіль, Ґлоґів, Любін і Ліґницю з Краковом, а два з них поіхают аж до Перемышля. Найскоршым получыньом Чужыны з Креницьом буде получыня о год. 8.14 з Ліґниці потягом IC Мегоффер, в Кракові пересідка на IC Малопольща, котрый в Креници єст о 17.47, в другу сторону, особовым приспішеным Никыфор о год. 5.10 з Крениці, в Кракові пересдка на IC Вавель, котрый в Ліґници буде о 13.43. Найскоршым получыньом Чужыны з Ґорлицями буде выізд з Ліґниці потягом IC Вавель о 14.15, в Кракові пересідка на IC Бєщады, котрый буде в Ґорлицях Загірянах о 21.39. В другу сторону з Ґорлиц Загірян о 7.13 (TLK Ветлина), пересідка в Кракові на IC Вавель, котрый в Ліґници буде о 13.43. З Вроцлавя до Кракова поіхат єденадцет потягів, з котрых сім поіхат дальше през Тарнів до Перемышля. Вартат спомниуты, же десят з них поіхат през Катовиці, єден през Ченстохову.

Ціна білетів в єдну сторону на другу клясу з Ліґниці до Крениці буде выносила од 76 зл. за потягы TLK і IC (PKP Intercity), а з пересідком в Тарнові на особовый потяг 68 зл. за потяг PKP Intercity i 13,80 зл за потяг Малопольской Желізниці (разом 81,80 зл). Студентскы білеты будут коштувати 37,24 зл, з пересідком 34,30+6,76 зл, а шкільны, одповідньо: 47,88 зл, або 44,10+8,69 зл. З Ліґниці до Ґорлиц Загірян заплатиме 72,00 зл за потягы PKP Intercity (студентскій за 35,28 зл, шкільный за 45,36 зл). Цікавом офертом єст Вікендовый Білет PKP Intercity, котрый коштує 81,00 зл і можна на ним іздити вшыткыма потягами IC i TLK, од год. 19.00 в пятницю до 6.00 в понедільок, по побраню в касі білету на сідачы місця. В долгы вікенды важніст білету ся продолжат.

По 13. марця 2021 рока не повинны сме ся сподівати великых змін сіткы получынь. Найчастійше сут то невеликы зміны годин курсуваня потягів. На тоту хвилю знатя, же на пути Тухів – Ловчувек Плесьна буде цілковите запертя желізницьового руху од 14. марця до 15. квітня/апріля 2021 рока. За потягы буде урухомлена Заступча Автобусова Комунікация. Вартат тіж спомнути, же в звязку з пандемійом Covid-19 можут быти одкликаны декотры потягы, што желізницьовы перевозникы будут оголошати на своіх інтернетовых сторонах і в социяльных медиях. Желаме Вам щестливой подорожы!

Богдан Копча

Вроцлав