«Lemkovyna-Lem» – онляйнова трансмісия концерту з Новиці

Уж в пятницю, 27. листопада/новембра, од 18.00 год. в Новици проходила буде трансмісия концерту «Lemkovyna-Lem». Вызвучат «Ой, верше, мій верше», «Гамерицкій край», «Кєд мі прийшла карта» та інчы лемківскы пісні, але в нештоденных аранжациях.

Як сме заявляли перед парома місяцями, проєкт «Lemkovyna-Lem» і того рока є продолжаный. Были варштаты пісен, чого результатом был концерт записаный в музейній церкви в Бротным, a на каналі проєкту в сервісі Youtube появили ся черговы кліпы з піснями і архівальныма знимками та ґрафіками зреализуваныма через VJ groupe CUBE.

Як заявляют орґанізаторы: «Lemkovyna-Lem» не буде звычайным онляйновым концертом. То радше спільне перебываня, рефлексия, зануріня ся в пісні в унікальным місци серед лемкіскых гір, де проходило дітинство Богдана Ігоря Антонича» – мож прочытати в запрошыню концерту. Видовиско реґіструване буде в старій деревяній хыжы в Новици, котра колиси была корчмом, пак находила ся гын почта. Тепер, як Дом Ікон, служыт як творче місце.

Oрґанізаторы подают дале, што: «Lemkovyna-Lem» то несподіване, сучасне получыня унікальных голосів, інструментів і відеоарту, якє занурит слухача в світ лемківской пісні, де перетинают ся безгранична пристрат і космічна мелянхолийніст». Выступлят Уляна Горбачевска з Украіны, Юлия Дошна, Александер Ворсоба з Білоруси, Ришард Лятецкій і Мацєй Кудлацік. Музичну атмосферу дополнял буде відеарт на основі фотоґрафій Лемковины з років 1920-1930 з родинного архіву родины Венгриновичів.

«Най тоты пісні співают разом з нами. Єм впевнена, што аж і через екран монітора енерґія гір, енерґія того старого дому, коминка з огньом, тых пісен буде одчувальна. Будеме разом: люде сідячы в своіх домах, мы в деревяній хыжы. Буде мож вєдно з нами наляти сой вина, поспівати, поплакати, повеселити ся. Повіла бы-м радше, што то не буде концерт, а спільна гостина» – додає на конец Уляна Горбачевска, режысерка цілой подіі.

Трансмісию концерту найдете за тым мотузком.