Сумар дня на 24. листопада/новембра 2020 р.

Приносиме вам сумар медияльной ґрупы ЛЕМ.фм+ на ден 24. листопада/новембра 2020 р.

«Меншыны на сцені»

Ольштыньскє Стоваришыня Німецкой Меншыны просит до віртуального конкурсу «Меншыны на сцені». Oрґанізуваный єст він з нагоды Дня Нацийональных і Етнічных Меншын, котрый того рока зо взгляду на пандемію перенесеный был до віртуального світа. Конкурс направленый єст на вшыткых представників нацийональных і етнічных меншын, што прожывают в Польщы. Конкурсова задача єст барз проста – треба опубликувати презентацию свойой меншыны. Форма презентациі не єст окрислена орґанізатором, може то быти знимка, фільм, співанка, а аж і верш ци рисунок. Зголошуваны презентациі треба опубликувати в коментари під конкурсовым постом на офіцийным фейсбуковым сайті стоваришыня до 30. листопада/новембра. В конкурсі признаны будут дві головны нагороды, єдна через конкурсову капітулу, а друга публику, тзн. выграт пост з найбільшым чыслом реакций. Орґанізаторы оголосят результаты 9. грудня/децембра. По більше деталів просиме на страну www.agdm.pl.

Ремонт державной дорогы но. 28 з Ґорлиц до Нового Санча, сут уж першы пляны

Рыхтуют ся великы зміны на державній дорозі но. 28 з Ґорлиц до Нового Санча. Ґенеральна Дирекция Державных Доріг і Автострад выбрала выконавцю заплянуваной розбудовы дорогы но. 28 з Санча до Ропы. Плянуваный буджет то близко 9,5 млн зл. На проєктовы працы і отриманя вшыткых будовляных дозволінь презначеных єст найбільше 41 місяців, по тым часі зачне ся будова. Уж тепер представник выконавці бесідує, же проєкт єст барз розбудуваный, але надіє ся, же вшытко буде ішло згідні з пляном. Розбудова тыкат ся м.ін. перебудовы скрижувань, будовы автобусовых затриманок, тротуарів і біциґльовых стежок та специяльных смуг до выпереджаня. Ґорлиці зас не одстают і не так давно тому підписали догваріня на розбудуваня державной дорогы но. 28 на одтинку долгости більше як 7 км в самій середині Ґорлиц. В тым припадку буджет то понад 3 млн зл., а вшыткы працы звязаны з перебудовом мают ся закінчыти за 3,5 рока. Пріоритетом сут зміны тыкаючы орґанізациі руху, зато в пляні нашла ся перебудова найбільшого ґорлицкого скрижуваня двох воєвідскых доріг но. 977 і 993, де скрижуваня заступит турбінове рондо з двома смугами. Окрем того перебудуване буде тіж скрижуваня з воєвідском дорогом но. 977 в страну Конечной.

«Річы од другой страны» нова стежка в Сандецкым Етноґрафічным Парку

В Сандецкым Етноґрафічным Парку, кєд вшытко піде згідні з пляном, на початку грудня/децембра одкрыта буде нова траса «Річы од другой страны». Модернізация скансеновой выставы пройде через введіня новой стежкы, додатку до постійной експозициі. Концепция новой трасы закладат оберніня перспективы і зачати досліджаня од дрібниці до цілости. Творит ю близко 120 предметів односячых ся до ріжных обшыри жытя, описаных і представленых в дакус інчый спосіб. Інновацийным елементом експозициі єст фільмовый каталоґ, зложеный з короткых фільмів, котры особливо призерают ся выбраным предметам. Траса буде вызначена і описана на скансеновых мапах.

Осіннє саджыня дерев в словацкых Татрах

Закінчено акцию осіннього масового саджыня дерев в словацкых Татрах. В тым часі посаджено близко 85 тис. саджінок на обшыри 39 гектарів, головно посаджено ялицю, але тіж бука, берест і клен. Словацкій Татряньскій Нацийональный Парк таку акцию орґанізує уж од років. Ведена єст она головно на обшырях пошкодженых через сильны вітры ци страпліня татряньскых природників жука короіда-типоґрафа.