На Зепмліні найменшу частку позітівно тестованых має окрес Меджілабірці

Найменшу частку жытелів позітівно тестованых на новый коронавірус в рамках другого кола тестованя має в реґіоні Земплін окрес Меджілабірці. Наопак, найвеце їх є в окресі Воронів над Топльов.

Тото выходить із резултатів тестованя, котры словацькій пресаґентурі TASR додало Міністерство обороны Словацькой републікы. Друге коло тестованя проходило через вікенд 7-го і 8-го новембра 2020-го року. Хоць словацька влада наперед думала над тестованьом цілой Словакії, як то было в першім колі почас попереднього вікенду, наконець друге коло проходило лем в окресах, де в першім колі было над 0,7 процента тестованых позітівных. Было то векшынов у окресах на севері Словакії.

Меджілабірці під 0,3 процента

В окресі Меджілабірці, котрый є найменшым на Словакії і єдночасно найрусиньскішым окресом, на другім колі акції Сполочна одповідность брало участь довєдна 6142 людей. Позітівный резултат антіґенового тесту мало 17 з них, значіть частка позітівно тестованых представлює 0,28 процента.

Окрес Меджілабірці ся лем недавно дістав меджі червены окресы на пандемічнім семафорі, причім в першій волні пандемії, котра проходила почас яри, ся довго тримав як єдиный окрес без інфікованых в рамках цілой Словакії. Теперь ся знова має шансу дістати меджі безпечнішы окресы.

В рамках реґіону Земплін другу найнизшу частку позітівно інфікованых мав нижньоземпліньскый окрес Собранці. Там взяло на тестованю участь 12 966 жытелів, причім позітівно тестованых было 43 людей, што представлює 0,33 процента.

В далшім окресі реґіону Земплін, в котрім так само є русиньске населіня, окресі Снина, была частка позітівно тестованых на уровни 0,57 процента, окрес Гуменне скінчів з 0,6 процента позітівно тестованых.

Оголошене далше тестованя

Друге коло тестованя проходило в 45-ох окресах Словакії, котры мали тыждень перед тым над 0,7 процента інфікованых, але і в далшых 13-ох зеленых окресах, де ся могли люди отестовати антіґеновыма тестами добровольно. Спомеджі веце як 2 міліонів отестованых было позітівно тестованых 13 509 людей. То представлює 0,66 процента.

Далше коло тестованя на хвороту COVID-19 на Словакії бы ся мало дотуляти лем коло 500 сел і 5-ох меншых міст, не цілых окресів, ці цілой країны. Проходити бы мало через вікенд 21-го і 22-го новембра. Інформовав о тім премєр Іґор Матовіч по понедільковім засіданю Централного крізового штабу.

Як інформовав Матовіч, дав пропозіцію, жебы ся высловно тестовали лем села і міста, де інціденція в другім колі тестованя была высша як єдно проценто.

Тестують і на граніці з Українов

Од понеділька 9-го новембра є складніше і подорожіня меджі Словакійов і Українов. Особы, котры приходять з україньского боку можуть хосновати лем гранічный переход Ужгород – Вышнє Німецьке, і то лем у становеленых годинах, а не цілых 24 годин.

На граніці ся мусять зохабити отестовати антіґеновым тестом. Окрім того платить і далше повинна домашня карантена, і найскоріше на пятый день карантены мусять особы, котры пришли на Словакію із Україны, іти на точнішый PCR тест. Державный секретарь Міністерства загранічных діл і европскых справ Словацькой републікы Мартін Клус то означів за пілотну акцію.

Таке саме тестованя бы ся подля Клуса могло запровадити і на чеській ці польскій граніці, покля бы Словакія записала меджі різіковы країны і Польщу. Головнов думков такого приступу є, жебы не закрывати граніці, як то было почас ярьной волны пандемії.

Жрідло фотоґрафії: Радвань над Лабірцьом.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА