Сумар дня на 9. листопада/новембра 2020 р.

Приносиме вам сумар медияльной ґрупы ЛЕМ.фм+ на ден 9. листопада/новембра 2020 р.

Потрібны волонтеры в до домів социяльной помочы

Ґорлицкє Повітове Староство і ґміна Санкова глядают волонтерів до домів социяльной помочы, кєд бы там дошло до масовых заражынь коронавірусом. Як поінформувала Мария Ґубала, ґорлицка старостка, на апель староства одповіло покля што лем дванацет осіб. Кєд же в такых місцях COVID-19 розносит ся барз скоро, такє чысло не старчыт, потрібны сут дальшы волонтеры. В домах социяльной помочы ґорлицкого повіту жыє актуально близко триста осіб в ріжным віку і стані здоровля. На зголошыня волонтерів рахуют і інчы, менчы домы социяльной помочы, примірово в Санковій. Гын свою поміч задеклярували покля што дві особи. Як бесідує війт ґміны Санкова Малґожата Малух, сут тіж в разі потребы добесідуваны з пожарниками. Волонтеры можут ся зголошувати до Дому Социяльной Помочы в Санковій або до інчых домів приналежных повітовому староству в Ґорлицях.

Перенесены Ґорлицкы Гірскы Бігы

В звязку з введіньом новых ограничынь, якы обовязуют в Польщы од минулой суботы, 7. листопада/новембра, перенесена буде VI едиция Ґорлицкых Гірскых Бігів. Згідно з новым розпоряджыньом до дня 29. листопада/новембра обовязує заказ орґанізуваня і ведіня спортовых подій або спортовых змагань, што тыкают бігів, спортового ходжыня або роверовой ізды. Ґорлицкы Гірскы Бігы орґанізуваны Біциґльовым Клюбом Grupetto Ґорлиці мали пройти в будучу неділю, 15. листопада/новембра в Высовій. Траса мала чыслити 24,5 км з перевысшынями до кілометра. Змаганя, залежно од ситуациі в державі, будут перенесены на зимовый період на злам лютого/фебруара і марця, або на 14. листопада/новембра 2021 рока. Дальшы інформациі найдете на офіцияльным сайті Бігів.

Нова стежка в Маґурскым Нацийональным Парку

Маґурскій Нацийональный Парк разом з Ґміном Санкова і Надлісництвом Ґорлиці зрыхтували для одвиджаючых дальшу, уж шесту природничу стежку. Ріжнит ся она кус од тых попередніх. «Бучыновом» буде мож повандрувати з Вапенного на Фердель і назад в тото само місце, але інчом дорогом. Єст то перша монотематична стежка, яка єст в більшости присвячена букам. Як бесідуют орґанізаторы – каждый, хто хоц раз тамадиль переходил, зрозуміє, одкаль ся взяла така думка. При стежці поставлено інформацийны табличкы з візирами, в котрых поміщены сут повязаны з головном темом стежкы інтересуючы інформациі.

Новый цикль семінарів в Музею Ікон в Варшаві

Музей Ікон в Варшаві і наукова Комісия «Speculum Byzantinum» Выділу «Artes Liberales» Варшавского Університету просят на цикль семінарів онляйн пн. «Православна штука давной Польской Республикы – малярство, ґрафіка, архітектура, література і містика». Семінары будут проходити каждого тыжня од 10. листопада/новембра і будут тыкати процесів синтезы і трансформациі східньохристияньской культуры в давній Польскій Республиці. Як подают орґанізаторы, Польска Республика была місцьом, де в рамках самой православной культуры стрітили ся дві східньохристияньскы традициі – пілнічна і полудньова. Православна культура давной ПР была і синтезом найцікавшых артистичных явиск поствізантийской культуры. До ПР дотерали і влияня з Молдаві, Балканів ци Св. Горы Атос. Держава так само лучыла Схід з Заходом, будучы великым культуровым котлом, з котрого ся родили цілковито новы культуровы явиска. Пeреносы з семінарів будут доступны медже інчыма на фейсбуковым фанпейджы Музею.