Сумар дня на 5. листопада/новембра 2020 р.

Приносиме вам сумар медияльной ґрупы ЛЕМ.фм+ на ден 5. листопада/новембра 2020 р.

Новы ограничыня войдут в суботу

Вчера о 14.00 год. одбыла ся пресова конференция польского премєра Матеуша Моравєцкого. Оголосил він список дальшых ограничынь, котры подля власти сут необхідны, жебы бороти ся з высокым чыслом хворых на коронавіруса. Премєр заповіл, же кєд не буде зреализуваный введеный вчера плян, то за 10 дни мож сподівати ся тзв. нацийональной кварантанны. В рамках новых ограничынь закрыты будут місця культуры, такы як театры, музеі, ґалериі штукы ци кіна. Наука онлянй розшырена буде так само для кляс 1-3 основных шкіл што найменьше до кінця листопада/новембра. Вшыткы ограничыня будут обовязувати од найблизшой суботы, 7. листопада/новемра, і мают тырвати напевно до 29. листопада/новембра. Премєр бесідувал і про тырваючы в Польщы протесты, спричынены результатом выроку Конситуцийного Трибуналу в справі аборциі. Подля слів Матеуша Моравєцкого протесты збільшыли чысло хворых. Введено так само новы ліміты в склепах і місцях культу. Уряд застерюг, же ограничыня можут быти продолжаны.

Лемківска мода в Коросні

В найблизшу пятницю, 6. листопада/новембра, в Коросні одбуде ся показ колекциі моды Анни Мариі Зиґмунт під назвом «Лемковина». Хоц, як сама бесідує, ниякого нотарияльного потверджыня на тото не мат, але лемківску душу має. Быти може завдякы тому завоювала світ моды свойом першом колекцийом «Лемковина». Показ зачне ся о 19.00 год. в Реґіональным Центрі Культур Погранича. Анна Мария Зиґмунт вкаже в модерным виді м.ін. ляйбикы, чугы, гуні, кабаты. Одкрытю подіі буде товаришыл концерт лемківской музикы од капелі Угерец. Проєктантка інспірує ся народным облечыньом Лемків. Як сама бесідує, єй «Лемковина» то нич інче як істория о Лемках, іх культурі, звыках, реліґійности, оповідана через моду. Символичным може быти факт, што вродила ся в 40. річницю од початку выселінь – 28. квітня/апріля 1987 р. В колекциі «Лемковинa» схоснувала авторскы полотна, ручні малюваный лен, баволну, вышыване волняне сукно. Взір, котрый є лейтмотивом для цілой колекциі, взятый є зо старой хыжы в Завадці Рыманівскій. Колекция была уж вказувана м.ін. в Кракові, Варшаві, Ґдыни, Ряшові ци Кєльцях. Презентувана была і в Будапешті на European Fashion Union ци Шавли, в пілнічній Литві на фестівали VIRUS та аж і в Азиі.

Засідал Св. Собор Єпископів ПАПЦ

В віторок, 3. листопада/новембра, засідал Св. Собор Єпископів Польской Автокефальной Православной Церкви. Рішено на ним м.ін. темы повязаны з пандемійом коронавіруса. Владыкы апелюют, жебы в добі загорожыня для християньскых вартости і моральных традиций мати позір на выхованя молодых ґенераций, што повинно быти предовшыткым достерігане серед духновных, катехетів і родичів, якы посылают своі діти на лекциі Закону Божого. Рішано і інчы темы, м.ін. ситуацию Православной Богословской Семінариі в Варшаві. Покликана была специяльна Комісия, котра має окрислити обшыр діянь працы з молодежом. Собор зрыхтувал комунікат, в котрым апелює ся на дотримуваня санітарных ограничынь і безпеку. На засіданю рішено і митрополитарны збіркы на поєдны ціли. В вересни/септембрі 2021 р. має одбыти ся цілоцерковна збірка на єдну з лемківскых парохій, тє. на потребы православной парохіі в Ліщынах.

Власти Ґорлиц упамятнили вояків

Власти Ґорлиц упамятнили вояків з І світовой войны, якы похоренены сут на вельох цмонтерях Низкого Бескіду. В минулый віторок на воєнным цмонтери но. 91 в Ґорлицях, під центральным памятником, символичны світила запалили Бургомайстер Ґорлиц Рафал Кукля і Секретар Міста Ґорлиці Данєль Янечек. Участ в подіі брал Ґенеральный Консуль Мадярской Республикы в Кракові др Тібор Gerencsér. Власти споминали на вшыткых вояків, незалежно од іх нацийональности і віроісповіданя. Вельох з них брало участ в тзв. ґорлицкій битві. Як інформує вебсайт міста Ґорлиці, візита Консуля Мадяр была нагодом на коротку бесіду на тему спілпрацы на ниві польско-мадярскых односин. Консуль свою місию в Польщы зачал 15. вересня/септембра.