Сумар дня на 4. листопада/новембра 2020 р.

Приносиме вам сумар медияльной ґрупы ЛЕМ.фм+ на ден 4. листопада/новембра 2020 р.

Нове/ старе державне свято на Словациі 

Список памятных днів і державных свят на Словациі розшырит ся о 4 памятны дни. Депутаты Нацийональной Рады Словациі схвалили пошыріня державных свят вчас вчерашнього 16. засіданя сойму. Єдным з новых, а по правді старых, державных свят буде 28. жолтня/октобра, значыт ден празднуваня выникнутя Чехословациі – державы, котра была спілтворена на рівни трьома нациями: Чехами, Словаками і Русинами. 28. жолтня/октобра буде єдным з шестьох державных свят на Словациі, але не буде дньом свобідным од роботы. Словацка Республика по своім выникнутю в 1993 році усунула тот ден зо списку державных свят, од 1999 рока свято вернули, але в формі памятного дня. Чехы дотепер гоноруют 28. жолтня/октобра як державне свято.

Што раз ближе до будовы бобслейового тору в Креници

Польскій Олимпійскій Комітет підпорил будову бобслейового тору в Креници. То чергова інституция по Польскым Союзі Бобслейовых Спортів та Польскым Союзі Бобслею і Скелетону, котра підперат діяня курорту, жебы такій тор побудувати. Бургомайстер Крениці Пьотр Рыба підкрислят, што такого обєкту в Польщы іщы неє. Хоче створити коаліцию, жебы разом старати ся о грошы, а тых буде треба коло 100 млн зл. Плянує старати ся о зовнішнє фінансуваня, центральне. Як додає – є то єдиный обєкт олимпійской дисциплины, котрого неє в Польщы, і треба тоту шансу схоснувати. Як інформували сме три тыжні тому, власти Крениці выбрали нове місце під будову тору. Зрезиґнували з ориґінальной локалізациі, значыт Парковой Горы. Рішыли, што ліпшым місцьом будут убочы горы Івонка, ниже котрой находит ся спортовый стадийон і галя ледовиска.

Буде новый дах і мышпергачы в цервки в Ріпнику

250 тис. зл буде коштувал ремонт і перебудуваня даху грекокатолицкой церкви в Ріпнику, днес містит ся в обєкті римокатолицкій костел, в ґміні Вояшівка на Коросняньскій Руси, енкляві лемківскых сел в сусідстві Коросна. Грошы походити будут з унійного дофінансуваня охороны рідкых ґатунків мышпергачы. При ремонті даху памятниковой святыні, яка походит з початку ХХ ст., зроблят специяльны діры, жебы мышпергачы вернули на під і там закладали своі колоніі. Ремонт зачне ся іщы того місяця, а скінчыт в марци будучого рока. Проґрам, до котрого приступила Реґіональна Дирекция Охороны Середовиска в Ряшові, разом достане дофінансуваня близко 1,5 млн зл. Хосен з того будут мати тіж костелы і церкви в Рівным, Скальнкику і Сєняві.

Заперты пути в Татрах і Бєщадах

Словацкы природникы з Татряньского Нацийонального Парку каждого рока заперают од листопада/новембра аж до яри высокогірскы шлякы з увагы на охорону природы та безпеку туристів. По польскій страні неє такых ограничынь, але туристы не будут мочы переходити через высокогірскы граничны переходы на словацку страну. До одкликаня єднак сут заперты вшыткы туристичны пути в польскых Бєщадах в обшыри Тарници, Шырокого Верха, Галича і Креміня. Має то звязок з транспортом материялів потрібных до ремонтів трас, по котрых вандруют аматоры гірскых прогульок. Од минулого понеділька заперты сут так само паркінґы в Устриках Выжніх і в Волосатым. Дирекция Бєщадского Нацийонального Парку просит туристів, жебы на час закрытя выберали інчы вариянты пішого вандруваня, як напр. по обшыри Смерека, Ветлиньской або Цариньской Полонин, Великой Равкы ци по природничых стежках в долині выжнього Сану.