Сумар дня на 30. жолтня/октобра 2020 р.

Приносиме вам сумар медияльной ґрупы ЛЕМ.фм+ на ден 30. жолтня/октобра 2020 р.

Крениця хоче мати своі горячы джерела

Крениця старат ся о веце як 100 млн зл з буджету державы на сфінансуваня ґеотермального верчыня в части міста Чорный Потік. Горячых джерел глядали гын уж 10 років тому, але не повело ся іх товды найти. Самоурядовы власти хотят вертіти дале. Попереднє верчыня, котре робила спілка Ґондольова Желізнция Креницка Яворина, закінчыло ся на глубокости такой 3 км. Не нашли товды горячой воды. З досліджынь, котрыма диспонуют власти, выходит, што горячы джерела можут ся находити на глубокости 5 км. Гляданя джерел може кошутвати веце як 100 млн зл. Місто зложыло внесок о фінансуваня верчыня до Нацийонального Фонду Охороны Середовиска і Водной Господаркы. Кєд Фонд розсмотрит го позитивні, інвестиция буде в 100% сфінансуванa з буджету державы.

До кінця 2021 зникнут отксичны одпады з Ґорлиц

Власти міста Ґорлиці підписали догваріня на вывезіня веце як 5 тис. тон небезпечнх одпадів з терену бывшой рафінериі нафты Ґлімар. До конкурсу оферт зголосили ся дві фірмы. Єдна подала як кошт цілой операциі суму коло 49 млн зл, друга – аж 75 млн зл. Выграла оферта з низшом квотом. Як подал бургомайстер Ґорлиц Рафал Кукля, акция вывозу буде великым лоґістичным і часовым вызовом. Перше будут вывожены тоты найбарже небезпечны токсикалиі. 40 млн дотациі на вывезіня одпадів походит од Заряду Нацийонального Фонду Охороны Середовиска і Водной Господаркы. Решту грошы покрыє пожычка взята од Воєвідского Фонду Охороны Середовиска. Плянуваный термін вывезіня цілости одпадів з обшыри Ґорлиц то конец 2021 рока.

Ґенерал Піка, котрый прослужыл ся Русином – нагородженый

Президент Чешской Республикы Мілош Земан, як і за попередні рокы, з находы державного свята, празднуваного 28. жолтня/октобра – Дня Выникнутя Чехословацкой Республикы, признал ордеры і медалі за заслугы на благо Чешской Республикы. Медже особами, якым президент признал одзначыня, є і армадный ґенерал Геліодор Піка, котрому президент in memoriam уділил Орден Білого Лева Воєньской Ґрупы І клясы. Ґенерал Піка был професийным чехословацкым вояком. Вчас І світовой войны боювал в чехословацкых леґіях як офіцер в Росиі і Франциі. Был начальником чехословацкой місиі в Совітскым Союзі. Заслужыл ся тым, што пару тисячів Русинів было пропущеных з Ґулаґів, до кторых достали ся за ілеґальне перекрочыня мадярско-совітскых границ. В своій депешы до президента Едварда Бенеша написал, што Русины сут лояльны, прочехословацкы, неприятельскы односно Мадярів і Німців. Так само завдякы тому ґенералови Русины могли творити чехословацкій армадный корпус ґенерала Людвіка Свободы. З огляду на епідемічну ситуацию президент Чех вручыт нагороды аж на другій рік.

До выграня м.ін. інтеліґентный зыґарок, безкабльовы слухавкы, флешка 128 ҐБ

Стоваришыня «Руска Бурса» в Ґорлицях просит до участи в плястичным і літературным конкурсі. До выграня барз атракцийны нагороды. Того рока проходит сотна річниця народжыня лемківской поетесы Меляніі Собин. З той нагоды просиме охочы діти (до 9 рока жытя) намалювати образок (свобідном техніком), котрый буде інтерпретацийом выбраного верша Собин. Для старшых учеників пропонуєме конкурс, в котрым можут выказати ся свойом креативністю в писаню. Задачом є написати твір на тему «Скарб мойой бабы/ мого діда», в котрым опишут тото, што є цінным для іх прародичів, чому не дадут пропасти, што хотят сохранити. Творы оцінюваны будут в двох катеґориях: школярів в віку 10-12 років та 13-15 років. Найліпшы творы будут опубликуваны на сайті лем.фм. Гын тіж найдете деталі і реґулямін конкурсу.