Сумар дня на 02. листопада/новембра 2020 р.

Приносиме вам сумар медияльной ґрупы ЛЕМ.фм+ на ден 02. листопада/новембра 2020 р.

Новы ограничыня в Польщы

В пятницю, 30. жолтня/октобра, польскы власти выголосили новы заказы і ограничыня, якы мают на ціли підтримати борбу з епідемійом коронавіруса. Од суботы, 31. жолтня/октобра, закрыты сут цмонтері. Заказ іх одвиджаня обовязує іщы днес. Другє рішыня тыкат працівників публичной адміністрациі, якы не мусят працувати стацийонарні. Одднес мают они робити лем на дистанс. Введено тіж зміны в системі кварантанны. Одтепер домашні особы зараженой Covid-19 не мусят уж чекати на інформацию од санепіду о початку кварантанны, має она автоматичный характер. Премєр Матеуш Моравєцкій апелювал тіж до сеньорів не выходити з хыжы, кєд не єст то абсолютно конечне.

Ремонт дорогы з Мохначкы до Крениці

Як інформує Пьотр Рыба, бургомайстер Крениці, ремонтовы роботы на одтинку дорогы з Мохначкы Выжньой в сторону реставрациі «Cichy Kącik » ідут згідно з гармоноґрамом. Кінчат ся роботы тыкаючы підбудовы дорогы. Кєд хвиля буде добра, завершыня робіт плянуване єст на текучый місяц. Кошт ремонту то праві 420 тис. злотых, з чого 50% походит з урядового проґраму Фонд Самоурядовых Доріг. Єст то друга, по улици Солотвиньскій, того типу інвестиция в тым році. На будучый рік є в Креници плянуваный ремонт ул. Андерса.

14. едиция циклю «Бортняньского поворот до Бортного»

В тым році прошла 14. едиция циклю концертів церковного співу пн. «Бортняньского поворот до Бортного». Цілю тогорічного проєкту была ревіталізация лемківской співочой традициі. З огляду на обовязуючы в державі ограничыня, спричынены фурт тырваючом пандемійом, проєкт мал форму варштатів, якых результатом єст ново выданя платня пн. «Церковны галицкы співы». В варштатах і награнях взял участ хор Клірос з Ґорлиц. Платню буде мож купити в малопольскых православных церквах на Пути Деревяной Архітектуры. Задачом проєкту єст підтримувати і шырити культуру, традицию і достоменніст Лемків, як тіж верніня заникаючого карпатского співу.

Фотоґрафічный конкурс ОКҐҐ

Осередок Культуры Ґміны Ґорлиці просит взяти участ в фотоґрафічным конкурсі пн. «Скарбы Малой Отчызны – найцікавшы місця Ґміны Ґорлиці». Фотоґрафіі будут оцінюваны в двох віковых катеґориях: 10-14 років і 15-60+. Кінцьовый термін присыланя прац то 30. листопада/новембра. Зголосити до конкурсу мож максимально три знимкы. Додатково преміюване буде присланя інформациі о місци, якє ся находит на знимці, леґенды або істориі тыкаючой фотоґрафуваного місця. Результаты будут поданы 7. грудня/децембра. Більше про конкурс мож чытати на офіцияльным сайті Осередка Культуры Ґміны Ґорлиці.

Позашкільны занятя в ЦКК безплатно

Центр Культуры в Креници інформує, што в звязку з теперішньом ситуацийом, спричыненом фурт пошырюючом ся пандемійом коронавіруса, в листопаді/новембрі і грудни/децембрі тр. позашкільны занятя для діти і молодежы будут проходити безплатно. Центр подає, же гармоноґрам занять не єст зміненый і же сут они ведены згідно з рекомендациями Головного Санітарного Інспекторату. На занятя можут ся зголошувати новы участникы.