Сумар дня на 02. жолтня/октобра 2020 р.

Приносиме вам сумар медияльной ґрупы ЛЕМ.фм+ на ден 01. жолтня/октобра 2020 р.

В Словациі вернули ограничыня

Уж більше як мілийон осіб вмерло з причыны коронавіруса – поінформувала Світова Орґанізация Здоровля. Ґенеральный директор той орґанізациі – Тедрос Гебреісус, заапелювал до урядів на цілым світі, жебы были «понад нацийональныма ограничынями». В Польщы поінформували вчера о 2000 новых зараженых. На цілым світі тырвают роботы над близко 240 потенцияльныма вакцинами. Більшіст є на початковым етапі, але 40 є уж в фазі клінічных досліджынь, а 9 – в кінцевій фазі тестів. Вчас середового засіданя чешского уряду затверджене было міністрами введиня выняткового стану в державі од 5. жолтня/октобра. Ограничыня будут тыкати м.ін. шкільництва, стріч більшого чысла осіб ци функцийонуваня реставраций. Надзвычайны середкы ввели уж по сусідскы Словакы. Премєр Ігор Матович оголосил, што од 1. жолтня/октобра обовязуют м.ін. ограничыня в орґанізациі імпрез і подій, вернул обовязок носити масочкы, кєд не мож тримати дистансу. Рекордове чысло захворінь занотували в середу на Украіні – бильше як 4 тис. В віторок о хвороті поінформувал бывшый президент Украіны Петро Порошенко.

Вікенд на спортово в Креници

Реалізация 11. едициі Таурон Фестіваль Бігів в Креници од долшого часу была непевна, єднак вікенд пройде як свято аматорів того спорту. Од днес до неділі в креницкым курорті проходят змаганя в літаню на парунадцетьох дистансах, од 1 км по улицях Крениці по 100 км по горах. Записати ся до участи мож аж і до піл годины перед стартом. Орґанізаторы сподівают ся веце як 3 тис. беручых участ в акциі. Ориґінальный термін імпрезы то серпен/авґуст, але товды Крениця находила ся в черевеній зоні і орґанізация буд-якой подіі была неможлива, з той причыны перенесли змаганя на початок жолтня/октобра. Орґанізаторы ґарантуют, што забезпечат необхідны середкы до дезинфекциі, медичну опіку, обовязувал буде заказ громадити ся в єдным місци векшого чысла люди. Змаганям товаришат торгы EXPO, а на сцені выступувати будут ляхівскы і ґуральскы ансамблі.

Выремонтували кресты в Команчы

В тыжни од 16. до 23. вересня/септембра проходила реалізация проєкту «Віртуальна Команча – шляком деревяной архітектуры, крестів і капличок», котрого головном цілю была реновация і модернізация придорожных кресів і капличок, якы находят ся на обшыри ґміны Команча. Вольонтеры з Ґмінного Осередка Культуры вєдно з функцийонариями Карного Закладу в Лупкові ремонтували обєкты малой архітектуры, чым причынили ся до охороны історичной спадковины той части Лемковины. Проєкт был фінансуваный з середків проґраму «Діяти локальні» Польско-Американьского Фонду Свободы.

Зберают накруты – любіняне помагают другым

В Любіні заінсталювали дальшы метальовы контенеры в формі серця. Тот, котрый появил ся в місті 10. вересня/септембра, скоро ся выполнил – жытелі Любіна протягом парох дни выполнили го плястіковыма накрутками. Доцільово Стоваришыня Любін 2006 хоче поставити 20 такых контенерів-серц. На початок зобраны грошы будут переданы на лікуваня Адама Мікося з Любіна, якій хворіє на раковину. В серци містит ся коло 80-90 кґ накруток. На тот момент зобрали уж 600-700 кґ. Коли поведе зобрати ся 5-6 тон, товды перевезут іх до місця, де сут скупуваны. Контенеры в виді серця запроєктувала і выконала любіньска фірма. Вшыткы кошты понесло Стоваришыня Любін 2006.

В Рашівці ліквідуют желізницьово-дороговый переізд

Вчера в Рашівці зачали ліквідувати желізницьово-дороговый переізд, якій находит ся близко бывшой паливовой стациі. Спричынене є то м.ін. розпорошеным правом власности до ділянок, якы находят ся в безпосереднім сусідстві переізду. Сам переізд находит ся на ділянці Надлісництва Ліґниця, веде до него внутрішня ґмінна дорога, што іде до ділянкы PKP. Дорога не ма статусу публичной, зато згідні з переписами переізд не може быти доступный так для авт, як і для пішых.