Добило сердце Ольгы Прокоп

3-го септембра 2020-го року в ночі у віці 79 років добило сердце Ольгы Прокоп, вызначной културно-общественной діятелькы серед Русинів Підкарпатя, але і цілой Карпатьской Руси. Ольгу Прокоп мож было знати наприклад із ґрупы Тріо Червена Ружа, котре записало албум Русь Пудкарпатська Сята.

Так само вела дітячій ансамбель Бабчина співаночка, співала і в ансамблі Чинадіївка. Была знаменитов орґанізаторков културных подій.

Ольга Прокоп народила ся 6-го септембра 1940-го року в селі Крива, недалеко Хусту, до родины Кіріла Прокопа, русиньского діятеля і політіка, котрый быв і в депутації, яка пришла за презідентом Томашом Ґаріком Масаріком зо жадостьов о приєднаня русиньскых теріторій до складу Чехословакії. Кіріл Прокоп быв одсудженый в Другім мараморошско-сіґетьскім процесі, в ктотрім судили православных Русинів. Почас 1-ой Чехословацькой републікы быв членом чехословацького парламенту. По анексії Підкарпатьской Руси Совітськым союзом быв знова судженый і арештованый. І вдяка тому Ольга Прокоп пережыла тяжке дітинство, коли зістала родина лем з мамов і не мали право мати властне обыстя. Но тоты складны часы єй не зломили.

Ольга Прокоп была професіоналнов културнов і довгорічнов общественнов діятельков. Роками учіла і русиньскый язык а културу в русиньскых недільных школах на Підкарпатю, котры орґанізовав русиньскый меценат з Канады Штефан Чепа. Прямо діяла або співпрацовала в многых музичных тілесах. Акцентовала нелем артістічны, но і патріотічны а выховлюючі аспекты у своїй творчости.

27-го мая 2016-го року почас ІХ. Бієнале лемківской/русиньской културы в Криниці была выголошена за лавреатку Премії імени Василя Турока-Гетеша, котру передавать Світова рада Русинів. Як втогды інформовав председа Світовой рады Штефан Лявинець, оцінена была за досягнены вызначны резултаты при розвитку, популарізації і презентації русиньской културы у вшыткых їй аспектах. Ольга Прокоп жыла в Чинадієві. Вічная память!

Радіо лем фм днесь, 3-го септембра о 16.00 год. одвысылать проґрам Пропаґанда з Ольгов Прокоп, котрый записав іщі у 2014-ім році Богдан Ґамбаль у пані Ольгы дома.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА