«Слово» – Успеніє Пресвятой Богородіці – неділя, 9.00 год.

Пережываме прекрасный праздник Успенія Пресвятой Богородіці. Ай кедь не находиме о тім празднику змінкы у Святім писмі, предці о подіях, котры одбыли ся в часі Марії із того світа, можеме дізнати ся з проповідей святых отців і нашых літурґічных текстів.

Архангел Гавріїл, котрый Марії звістовав втіліня Божого Сына, знова приходтиь ку Божій Матери, жебы їй звістовав радостну новину, же мине уж лем куртый час а она увидить Свого Сына. Апостолы, котры были поросходжаны по цілім світі, проповідуючі євангеліє, были чудесным способом перенесены до Єрусалима, жебы были свідками одходу до вічности Божой Матери. Сам Господь із неба зо святыма ангелами зышов на землю, жебы прияти душу свойой Матери.

Яка радостна і блажена была смерть Марії. Она цілый жывот повнила Божу волю, все в каждій сітуації говорила: най діє ся Божа воля. Слухала Боже слово і сохраняла у своїм седці. Прото і їй смерть была радостным заснутьом. Она ся не бояла смерти, але тішыла ся на ню, бо хотіла быти зо своїм Сыном і Богом.

Тот праздник указує і нам, же на Марії ся выповнили слова, котры Ісус говорив: Іду вам приготовити місце… потім прийду і возьму вас, жебы сьте і вы были там, де і я єм.

Кедь будеме і мы робити Божу волю, слухати Його слово, сохраняти у своїм сердці, жыти подля Його заповідей, втогды і наша смерть буде радостным переходом до вічной блажености. Так і на нас ся на наповнять Хрістовы слова, кедь прийде в славі, жебы своїм выбраным повів: Подьте благословлены мойого Отця, наслідуйте Царьство небесне. Слава Ісусу Хрісту!

В неділю, 30. авґуста 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 30. авґуста о 12.00 год. і 31. авґуста о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА