Сумар дня на 28. серпня/авґуста 2020 р.

Приносиме вам сумар медияльной ґрупы ЛЕМ.фм+ на ден 28. серпня/авґуста 2020 р.

Праздник Успіня Пресвятой Богородиці

Днес за юлияньскым календарьом єден з дванадцетьох великых церковных праздників, Успіня Пресвятой Богородиці, якым кінчыт ся попереджаючый го тзв. Успеньскій піст, званый тіж на Лемковині Маткобіжаным постом, тырваючым два минулы тыжні. Храмовы праздникы проходят днес в вельох парохіях, де жыют Лемкы. З нагоды святя, желаме веселого святкуваня в Олесници, Зимній Воді, Лугах, Щавным, Ліґници і інчых місцях світа, де празднуєте в церквах кєрмєш, постеріганый тіж і называный Малом Пасхом.

Засіданя РОС в Лабірци

В минулу середу, 26. серпня/авґуста, одбыло ся засіданя власти меджелабірского одділіня Русиньской Оброды на Словациі, на котрым участны были не лем члены орґанізациі, але і запрошены гості. Засіданя мало як ціль омовити реалізацию проєктів „Меджелабірці – головне місто Русинів”, „Русиньска осін під Камяном” і „Ґалерия русиньскых особности”. Присутны, з причыны зачынаючого ся онедолга шкільного рока в основных школах і предшкільных одділінях, просмотріли проєкт про русиньскы клясы „Стежками русиньской істориі”. Окрем того, на засіданю власти меджелабірского одділіня Русиньской Оброды на Словациі была бесіда о повселюдным списі, якій так в Польщы, як і на Словациі, одбуде ся в 2021 році.

З Лемковины через Пряшівску Русь на… Лемковину

До кінця серпня/авґуста текучого рока має быти оддана до хоснуваня роверова стежка, якой пут буде вюл з Мушыны до Пивничной. Інтересна буде тым більше, што буде вела через надпопрадскы в тым і рысиньскы села по словацкій стороні границі. Тота стежка єст получена з долшом, котра веде через Бардиівскы Купелі, Креницю, Мушыну, Пивничну. Щавницю і Вышні Ружбахы. Припустный термін одданя 27-кілометровой стежкы з Мушыны до Пивничной, заявленый на конец серпня/авґуста, зъістит ся, кєд заплянуваны технічны одобраня підут подля пляну. Не смотрячы на тото, буде то єдна з красшых біциґльовых пути, зъєдиняюча місцевости по лемківскій і пряшівскій части Карпатской Руси.

На праздник підут з поломництвом

Вертаме до церковных тем, понеже катедральна парохія св. Тройці в Ґорлицях заявила уж плян святкувань на ден памяти священномученика Максима Ґорлицкого. На своім фейсбуковым фанпейжды запрашат до участи в торжественных богослужынях з нагоды праздника лемківского святого, якы одбудут ся в днях 5.-6. вересня/септембра 2020 рока. В порядку богослужынь найдеме Всеночне Бдіня в суботній вечер попереджаючый свято, а на неділю молитвы будут возношены перед мощами святого од 8.30 год., коли буде правленый акафист, пак одбуде ся привитаня прибывшых архіпастырів, а од 10.00 год. зачне ся святочна Божеска Літургія. Праздникови свщм. Максима уж од парох років товаришыт єднодньове поломництво, якє і того рока рушыт зо Ждыні по ранішній Службі Божій, яка зачне ся 5. вересня/септембра о 5.00 год. в тамтышній православній церкви. Поломникы підут через Ґладышів, Маластівску Маґуру, Прислоп, Новицю і Білянку, жебы конечно встигнути на Всеночну, зачынаючу святкуваня в катедральній церкви св. Тройці в Ґорлицях.