Пряшівскый край вытворив про еврофонды три субреґіоны. Свідник і Стропків ся доїднали на граніцях

Становліня граніць субреґіонів на новый проґрамовый період 2021-2027 было в пятніцю 28-го авґуста 2020-го року цільом стрічі представителів окресів і міст Свідник і Стропків з веджіньом Уряду Пряшівского самосправного краю (ПСК).

Як інформовала говоркыня ПСК Даша Єленьова, окрес Свідник буде належати реґіону Шаріш, і окрес Стропків до реґіону Вышній Земплін.

Субреґіоны про черьпана еврофондів

Становліня такзваных субреґіонів выходить з методікы Міністерства інвестіцій, реґіоналного розвитку і інформатізації Словацькой републікы, котра давать напрямы односно штатуту Рады партнерства, якый є основным про вырішованя еврофондів і іншых жрідел в новім проґрамовім періоді.

Ґесторами суть высшы теріторіалны цілкы (жупы), котры собі становлюють свої субреґіоны або стратеґічно-плануючі реґіоны. Пряшівскый самосправный край на своїй теріторії вызначіть три стратеґічно-плануючі реґіоны – Спіш, Шаріш і Вышій Земплін. 

Попрад, Пряшів, Гуменне

„Запросили сьме представителів окресу Свідник і Стропків, бо сьме хотіли досягнути граніцю меджі окресами на зачатку консензусом. Знаме, же в минулости были єдным окресом, мають свої перепоїня, но на другім боці, з історічного погляду, належать до іншых історічных реґіонів. Заключіньом є, же окрес Свідник буде в реґіоні Шаріш і Стропків буде належати під Вышній Земплін,“ повіла ведуча Одділіня стратеґічного розвитку і проєктового ряджіня Уряду ПСК Мартіна Сливкова.

Стратеґічно-плануючій реґіон Спіш буде мати свій центер в Попраді, реґіон Шаріш в Пряшові і Вышній Земплін буде рядженый із Гуменного.

Субреґіоны край задефіновав на основі аналізы історічно-ґеоґрафічных факторів, транспортной інфраштруктуры, лолалізації промысловых парків, можливостей турістічного руху і далшых факторів. Їх вытворіня бы мало в новім проґрамовім періоді 2021-2027 помочі зінтензівнити інтеґрацію когезной політікы до народных політік і інтеґрованых політік розвитку высшого теріторіалного цілку, міст і сел.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА