В окресі Стропків хотять реалізовати проєкт Купельна путь. Партіціпують і русиньскы села

В окресі Стропків планують ліпше схосновати мінералны жрідла і взаємно їх перепоїти про розвиток турістічного руху. Містным самосправам помічну руку при реалізації проєкту під назвов Купельна путь подав Пряшівскый самосправный край (ПСК).

Якраз председа жупы Мілан Маєрьскый в пятніцю 28-го авґуста 2020-го року підписав із участниками ініціатівы меморандум о співпраці. Інформовала о тім говоркыня ПСК Даша Єленьова.

Ексклузівный і амбіціозный проєкт

Документ обовязує партнерів актівно співпрацовати при реалізації конкретных задач і актівностей, як і вєдно творити добры условії про розвиток хосенной і ефектівной співпраці. Цільом партнерів є розвиток окресу Стропків у области турістічного руху, конкретно в рамках проєкту Купельной пути.

„Іде о ексклузівный і барз амбіціозный проєкт, котрый выхоснує мінералны жрідла в реґіоні про зряджіня лічебно-регабілітачных центрів і взаємно їх перепоїть біціґльовыма стежками і місцями про одпочінок. Проєкт має дати вклад до розвитку окресу, вытовріня новых робочіх місць про цілый реґіон, як і до залучіня марґіналізованых ґруп населіня. Думка є добра і рішыть веце проблем нараз, значіть має нашу підпору,“ повів по підписі меморандума жупан Мілан Маєрьскый.

Як председа ПСК далше повів, край тому проєкту може конкретно помочі в области освіты будучого персоналу, перепоїньом з дуалнов освітов, як і модернізаційов драговой інфраштруктуры ку задумованым цілям лічебно-мінералной трасы.

В проєкті за 250 міліонів і русиньскы села

Партнером будучой співпраці є веце містных самосправ, за котры меморандум підписав предноста Окресного уряду в Стропкові Петер Гавран.

Як Гавран конкретізовав, підис меморандуму з ПСК опередив договор о взаємній співпраці веце участників містного розвитку, котры будуть на проєкті Купельной пути партіціповати. Конкретно іде о Брусніцю, Ґрибів, Хотчу, Колбівці, Малу Поляну, Сташківці, Токаїк, Тураны на Однавов, Варехівці, Войтівці, Вышній Грабовець і місто Стропків.

Проєкт рахує з вытворіньом 12-ох меншых лічебно-регабілітачных центрів, ревіталізаційов околіці існуючіх мінералных жрідел і перепоїньом далшых актракцій реґіону. По реалізації напланованых актівностей проєкт має выґенеровати понад 1100 робочіх місць.

Розрахунок проєкту одгадує ся на 250 міліонів евр, котры хоче окрес Стропків, якый належыть меджі найменше розвиты окресы ПСК, здобыти з підпоров державы, припадно з операчного проґраму Словакія.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА