Сумар дня на 26. серпня/авґуста 2020 р.

Приносиме вам сумар медияльной ґрупы ЛЕМ.фм+ на ден 26. серпня/авґуста 2020 р.

Два цмонтері з часів Великой Войны

Науковці з Інституту Археолоґіі Ягайлоньского Університету одкрыли і дослідили два цмонтері з періоду І світовой войны в околицях Лупкова. В рамках проєкту «Карпатскы епізоды Великой Войны» на місци кырвавых боів войск Австро-Мадяр і Росиі з 1914-15 рр., тогорічны спільны досліджыня працівників Інституту і локальных любителів істориі принесли хосенный результат найти на основі ґеорадарів і цифровых моделів тамтых околиц припустны локалізациі теметовів в Лупкові і Зубеньску. Лупківскій цмонтір составленый єст з 2 секторів, а в Зубеньску то 4 пілколеса, де поховано понад сто років тому мощы вояків обох сторін конфлікту. Проєкт «Карпатскы епізоды Великой Войны» довюл до найдіня вельох артефактів з часів І світовой войны – то не лем особисты предметы жолнірів, фраґменты облечыня, але і польовы укріпліня, огньовы і артилерийскы становиска, аж і остаткы землянок, якы служылы як скрытка для вояків, пункты командуваня, ци склады амуніциі. Найдены артефкаты пройдут онедолга консервацию, а в плянах єст зорґанізувати іх выставу.

Владарі курортів на спільным засіданю

В предвчерашній ден, 24. серпня/авґуста 2020 рока, Місто і Ґміна Щавниця была орґанізатором загального зобраня членів Стоваришыня Курортных Ґмін Польской Республикы. Владарі курортных ґмін дискутували над текучыма справами, діянями і розвязанями жытя поєдных адміністрацийных єдиниц в обставинах пандеміі коронавіруса Covid19 і браком центральной помочы і підпоры для курортів. Дякуючы за участ вельох війтів і бургомайстрів, ґазды тогорічной стрічы враз з присутныма членами рішыли плян діянь на будуче, а і темы і проблемы, якы будут пак заявлены і представлены поєдным міністерствам. По засіданю пришол час звидіти Щавницю, сплынути Дунайцьом і выйти на поблизкій верх Палениця.

ПУЛьС буде концертувал над Земплиньском Шіравом

Послідня неділя серпня/авґуста, яка являт ся тіж послідньом недільом тогорічных вакаций, для любителів Піддукляньского Умелецкого Народного Ансамблю ПУЛьС буде ся любила. Тот професийональный і знаный на цілым світі ансамбль выступит в недільне пополудне в туристично атракцийным місци – в амфітеатрі над Земплиньском Шіравом. Перед ПУЛьСом выступит зо своім проґрамом ґрупа Железяр. Піддукляньскій Умелецкій Народный Ансамбль был основаный в 1955 році і од тамтого часу славит і вказує русиньскій фольклор з обшыри днешньой східньой Словациі, діючы як професийональна інституция культуры під омофором самоуряду Пряшівского Краю. За свою богату історию ПУЛьС выховал більше як 500 професийональных артистів. Многы з них продолжали свою карєру в другых орґанізациях і ансамблях на Словациі і заграницьом, ведучы колективы, або будучы професийональныма інструкторами, передаючыма своє богате знаня дальшым поколіням.

Остережыня для ідучых до Хорвациі

Польскє Міністерство Заграничных Справ 25. серпня/авґуста заявило на своім Твітері, што в тій хвили рекомендує стримати ся од прогульок до Хорватской Республикы, кєд не сут они необхідны. Вшытко тото з причыны міцно пошырюючой ся в Хорвациі пандеміі Covid19. На своіх сайтах Міністерство дополнило, же рівен заражынь коронавірусом єст актуально двараз высшый як в Польщы і має збільшаючу ся тенденцию. В Хорватскій Республиці обовязує наказ ношыня масок в торговых обєктах, медичных єдиницях, публичным транспорті, в тым на промах і в таксі. Введены ограничыня тыкают тіж працы ґастрономічных і розрывковых пунктів, якы сут одкрыты максимально до пілночы і можут обслугувати клієнтів лем на одкрытым повітри. Ограничыня в Хорвациі досягнули і кількости присутных на весілях і похоронах, аж і приватных імпрезах. Хорватскы власти призывают тіж зохабити пілтораметровы одступы помедже людми, припоминаючы, што в ситуациі, кєд бы епідемічне загорожыня нагло ся розросло, можут вводити дальшы рестрикциі.

Фото горі: Facebook // Stowarzyszenie Gmin Uzdrowiskowych RP