Сумар дня на 25. серпня/авґуста 2020 р.

Приносиме вам сумар медияльной ґрупы ЛЕМ.фм+ на ден 25. серпня/авґуста 2020 р.

Фільм о Вєлежыньскым. Треба статистів

В Ґорлицях буде зниманый фільм. Телевізия Обєктив, яка єст продуцентом образу «Лукасєвич – нафтар романтик», хоче реалізувати дальшый фільм, тым разом о Марияні Вєлежыньскым – піонєрі світовой ґазовой голузи. Як раз продуцент глядат тепер статистів. В цілу ініциятиву влучыло ся тіж Місто Ґорлиці. Акция фільму буде проходила в роках 1900-1940. Статисты будут потрібны до одограня сцены з 1937 р. Будут они зниманы в днях од 29. серпня/авґуста до 6. вересня/септрембра тр. в Ґорлицях а тіж в Яслі, Коросні, Саноку і Бубрці. Заінтересуваны особы мают самы добрати собі облечыня і зробити характеризацию. На статистів глядат ся предовшыткым мужчын в віку 20-45, котры будут мати баюсы і темне облечыня. Жены в такым самым віку мают мати долгу сукєнку або плісуваный кабат, білу кошелю і жакєт. Продуцент на інтернетовым сайті Міста Ґорлиці опубликувал пару знимок з 30. років ХХ ст., так жебы заінспірувати характеризацию будучых статистів. Більше інформаций достанете прямо од продуцента. Контакт так само на сайті Міста Ґорлиці.

ХІ Лемківскій Вечер в Коросні

В найблизшу суботу, 29. серпня/авґуста, одбуде ся ХІ Лемківскій Вечер в Коросні. Імпреза зачне ся о год. 19.30. Вчас подіі выступит Капеля Спід Рубані. Лемківскы Вечеры одбывают ся в Коросні од 2014 р. Думкодавцями і творцями акциі сут Анна Романчук і Пшемек Поляньскій. Спілорґанізаторами і выконавцями першых пятьох едиций были тіж музикы ансамблю А Де То Давнійше Стоіло. Традицийом єст, же презентуваный на подіі репертуар навязує до давных і тепершніх лемківскых пісен. Капеля Спід Рубані, котра запрезентує ся на ХІ Лемківскым Вечері, то ґрупа, яка выгрыват лемківскы співанкы і поезию. В єй складі сут Анна Борковска, Михалина Бучыньска, Марцелина Войтонь, Войцєх Пельчар і Ярко Мазур. Подія одбуде ся в Парковій Реставрациі в Коросні. Вступне 20 зл.

«Односины» в Музею в Пряшові

В Музею Русиньской Культуры в Пряшові іщы лем до 30. серпня/авґуста мож видіти выставу творів Штефана Гапака під назвом «Ріка часу». В рамках той експозициі в середу, 26. серпня/авґуста, буде о 16.00 год. проходила подія під назвом «Медайльон Штефана Гапака». Але музей рыхтує уж дальшу выставу. В пятницю, 28. серпня/авґуста, буде од 17.00 год. проходил вернісаж новой выставы з назвом «Односины», в рамках котрой будут одпрезентуваны творы Владиміра Ґаная, молодого пряшівского артисты русиньского походжыня. Ґанай закінчыл маґістерскы студиі під опіком проф. Станіслава Балька на Академіі Штук в Баньскій Быстрици. Од 2009 р. презентувал ся на колективных і індивідуальных выставах в Пряшові, Кошыцях, Баньскій Быстрици, Пыльзні і Кутній Горі. Артиста хоснує традицийны малярскы жанры. Куратором выставы є Данєля Капральова.

Ограничыня на обшыри ґміны Устя Рускє

Ґміна Устя Рускє подала дальшый комунікат од Малопольского Біциґльового Звязку, што в найблизшу суботу і неділю, 29. і 30. серпня/авґуста, одбуде ся Гірскій Чемпіонат Польщы. Буде він проходил на обшыри двох сусідніх ґмін: Устя Рускє і Ропа. Змаганя будут одбывати ся вколо климківского заливу, а точнійше такых сел як Устя Рускє, Климківка, Лося, Білянка, Ліщыны, Кункова. В звязку з тым будут деякы ограничыня в руху, на поєдных путях до выміненых місцевости. Змаганя будут в суботу од 9.00 до 18.00 год., а в неділю од 9.00 до 13.00. Інформує ся, што доіз до Устя Руского, Высовы і Ганчовы буде одбывал ся доіздом Ропы, через Брунары і Чарну.