Сумар дня на 24. серпня/авґуста 2020 р.

Приносиме вам сумар медияльной ґрупы ЛЕМ.фм+ на ден 24. серпня/авґуста 2020 р.

Малопольща на першым місци заражынь COVID-19

Малопольща фурт на першым місци новых заражынь коронавірусом. Суботній рапорт бесідує о рекордовых – 193 припадках, найбільше з Нового Санча і Кракова. В реґіоні вмерли тіж наступны три особы. Новых зараженых є 50 осіб в Новым Санчы, 43 в Кракові, 21 в новосандецкым повіті, 15 в новотарскым, 14 в лимановскым, 13 в краківскым, 11 в тарнівскым, по 4 в вадовицкым і вєліцкым, по 3 в ґорлицкым, освєнцімскым і прошовицкым, по 2 в бжескым, мысленицкым і татряньскым і по 1 особі в хжанівскым, мєховскым і сускым. 16 осіб єст госпіталізуваных, решта єст в ізоляциі. Актуально в Малопольщы потвердили 6338 заражынь коронавірусом. В воєвідстві вмерло 109 осіб.

200 зараженых в креницкым шпытали

Од днес Повітовый Шпыталь в Креници буде мал опіку над зараженыма коронавірусом. Медже інчыма о тым бесідувал 21. серпня/авґуста новосандецкій староста Марек Квятковскій з Малопольскым Санітарным Іспектором – Ярославом Форемным. В стрічы участ брали і посол Аркадиюш Мулярчык і голова сандецкого Санепіду Матеuш Вуйцік. Оцінено на ній і теперішню ситуацию на обшыри Новосандецкого Повіту. Рішыня про опіку над 200 особами креницкым шпытальом выходит з того, же в шпытали в Кракові бракує уж місц. Подібна ситуация єст в шпытали в Новым Санчы. Потребы сут великы, а ситуация в Малопольщы не єст добра. Мусиме быти солідарны і помочы в такій хвили, тым барже, же вельох хворых з Сандеччыны корыстало з помочы медичных єдиниц в Кракові – повіл староста Квятковскій. Припоминат він о дотримуваню санітарных принципів: треба носити масочкы, часто дезинфекувати рукы і предовшыткым ограничыти участ в великых імпрезах в закрытых локалях.

Пункт тестів на COVID-19 в Польковицях

В Польковицях одкрыли пункт, де роблены будут тесты на присутніст COVID-19. Жытелі реґіону не будут уж мусіти іздити до інчых, часто далекых місцевости, жебы зробити тест і скоро достати результат. Пункт одкрыли на основі догваріня о спілпрацы, підписаного Польковицкым Центром Здравотных Услуг і Повітовым Шпытальом в Болеславци. Пункт находит ся на обшыри польковицкой лікарні. Бургомайстер Польковиц, Лукаш Пузьнєцкій, бесідує, што в вчасі фурт тырваючой епідеміі коронавіруса час проведіня досліджыня на присутніст COVID-19 може одограти ключову ролю, а што за тым іде – причынити ся до збільшыня безпекы пациєнтів. Простір, на якій роблены сут тесты, є одізолювана од решты приходні. Специяльно выділены сут і паркінґовы місця для пациєнтів пункту. В одкрытым в Польковицях пункті дижуры будут полнити медичны працівникы Повітового Шпыталя в Болеславци.

Прогулька в Бєщады «Там і назад»

Шолтыс села Щавне-Куляшне, Публична Бібліотека і Осередок Культуры в Шавным просят на прогульку желізницьом в Бєщады SKPL «Там і назад». В проґрамі переізд потягом до Лупкова, ватра з печыньом кобасы і дорога назад до Щавного. Початок в середу, 26. серпня/авґуста, о год. 16.40. Збірка 20 минут перше на желізницьовій стациі в Щавным. Потяг буде назад на год. 18.47. Діти лем з опікуном. Вшыткы кошты покрыют орґанізаторы. В звязку з пандемійом треба взяти зо собом охоронны маскы. Записы лем до кінця днешнього дня в шолтыса села Щавне-Куляше, або в Публичній Бібліотеці в Щавным.