Сумар дня на 24. липця/юлия 2020 р.

Приносиме вам сумар медияльной ґрупы ЛЕМ.фм+ на ден 24. липця/юлия 2020 р.

Раптовне збільшыня чысла зараженых коронавірусом в новосандецкым повіті

Вчера інформували сме о новых припадках заражыня коронавірусом в Устю Рускым, а днес переносиме ся дале на захід. Наремне збільшыня чысла зараженых коронавірусом в новосандецкым повіті змусило президента міста перервати урльоп і скликати надзвычайне засіданя кризового штабу. На обшыри того повіту зараженых є 415 осіб, в самым Новым Санчы 76. Подля найновшых даных в сандецкым явило ся дальшых 19 – найвеце в цілым малопольскым воєвідстві. Осередкы хвороты появили ся по трьох весілях, в дому соспільной помочы, а тіж в великых фірмах: Fakro, Konspol i Wiśniowski. Президент Нового Санча Людомір Гандзель звернул ся до воєводы з просьбом провести ґенетичны скрінінґовы аналізы в сандецкым шпытали та збільшыти чысло доступных амбулянсів для сандецкой санітарно-епідемійолоґічной стациі. В сумі в малопольскым воєвідстві заражыня коронавірусом потверджено в 2721 осіб. Звекшене чысло заражынь в новосандецкым повіті є выкликане м.ін. осередками коронавіруса, якыма вказали ся весіля орґанізуваны в посліднім часі. Разом з четвертым етапом одморожаня економікы уряд знял ліміт участників похоронів та дозволил на орґанізацию весіль і імпрез до 150 осіб. Тепер масовы імпрезы то як раз потенцияльны осередкы заражынь.

Лемківскы церкви ожывит джазова музика

В выбраных обєктах Пути Деревяной Архітектуры в Малопольщы зас зазвучыт найкрасша музика розмаітых жанрів. Тіж в лемківскых церквах. Фестіваль «Музика заклята в дереві» уж добрі ся розкрутил. За нами першы концерты в рамках вакацийных подій фестівалю. Перед нами іщы вельо концертів, м.ін. на Лемковині. 16. серпня/авґуста пройде першый в тым сезоні концерт в лемківскым храмі. В церкви св. Параскевы в Квятони выступит GGDuo. То дует, якій творит Ґабрєля з мужом Войцєхом. Заложыньом дуету є творити свою, неограничену жанрами і стилями музику. Она дає вокаль. Він звукы басовой ґітары. Дальшым концертом, якій вызвучыт в церковных стінах, буде выступ дуету: Михал Салямон на клявішах і Мілош Сквірут на контрабасі. Музикы выпрацували свій особливый, околоджазовый стиль і язык. Іх выступ пройде уж в першу неділю вересня/септембра в церкви св. Якова в Поворознику. Полный проґрам найдете на сайті фестівалю. Там тіж найдете мотузок до каналу Youtube Пути Деревяной Архітектуры в Малопольщы, через котрый можете одслухати каждого з концертів. Зо взгляду на пандемію лем ограничене чысло осіб може быти в обєкті вчас выступу нажыво.

Дармовы вступы до музеів

В рамках соспільной ініциятивы «Потяг до культуры» на вакациях можеме дармо видіти пят підкарпатскых музеів: Історичный Музей в Саноку, Музей Народного Будівництва в Саноку, Підкарпатскій Музей в Коросні, Музей Мариі Конопницкой в Жарновци та Округовый Музей в Ряшові. Вымогом безлпатного звиджаня є вказати білет на потяг Вояк Швейк, якій іздит на трасі Ряшів-Меджелабірці-Ряшів, што был урухомленый Маршалком Підкарпатского Воєвідства. До музеів мож безплатно войти до трьох дни од даты перезіду потягом.

Одкрытя рекреацийного комплексу в Маластові – дармовы розрывкы

Уж в тоту суботу і неділю пройде великє одкрытя рекреацийного комплексу в Маластові коло лыжной стациі. Два дни буде мож дармо іздити по новоутвореным понтоновым торі. Є то ініциятива ґміны Санкова, котра хотіла, жебы стация была популярна тіж літом, особливо зато, што в остатніх роках снігу є барз мало. При іґелітовым торі, кус ниже, поставили тіж деревяный будинок, жебы мочы кус присісти і одпочати. Вельо змінило ся тіж на Маластівскій Маґурі, де готовый є пляц забав з видоковыма тарасами та стежком, котра веде на вершок. Сут і місця, де мож лежакувати, схоронити ся перед сонцьом, ци місця розрывкы для діти. Желаме приємного вікенду.