В гуменьскім сканзені зазвучать найстаршы русиньскы співанкы Марії Чокиновой

Вігорьлатьскый музей в Гуменнім вєдно із партнерами приготовлює концерт народных співаной реґіоналных фолклорістів під назвов Співанкы Марії Чокиновой з Ублі.

Концерт є присвяченый єдній з найвызначнішых інтерпреток традічных русиньскых співанок на вышнім Земпліні  – Марії Чокиновій (рр. 1947 – 2010), із нагоды десятой річніці їй смерти. О концерті, котрый одбуде ся в Експозіції народной архітектіры і бываня – в сканзені, 2-го авґуста 2020-го року зо зачатком о 16.00 год., інформовала Яна Федічова із Вігорлатьского музею в Гуменнім.

В концертнім проґрамі представлять ся солісты Людовіт Джубак, Ванда Марінчакова, Людка Квашна, Дівоча співацька ґрупа Босорочкы, Мужска співацька ґрупа Гачуре, Фолклорный колектів Хемлон Гуменне і Дітячій фолклорный колектів Хемлонячік з Гуменного.

„В репертоарі выступаючіх зазвучать і співанкы, котры Марію Чокинову вовели на найвысшы позіцїї фолклорных конкурзів, а незабытнов інтерпретаційов і до сердець їй слухачів,“ інформовала Федічова.

Чокинова почас свого актівного діяня здобылиа дакілько тітулів лавреаткы на реґіоналных фестівалах народных співаной Земплін шпіва, Маковицька струна, Співы мого роду і тітул лавреаткы в цілодержавнім конкурзі фолклору в Баньскій Быстріці.

Концерт в сканзені в рамках літньой понукы Вігорлатьского музею є частьов дослідно-документачной і освітньой діялности музею, котра підтримує презентацію нематеріалной културной дідовизны реґіону. Подію підпорила і Русиньска оброда на Словеньску.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА