Сумар дня на 25. червця/юнія 2020 р.

Приносиме  вам  сумар  медияльной  ґрупы  ЛЕМ.фм+ на ден 25. червця/юнія 2020 р.

Селу Пыхні помагат войско

Вчера сме апелювали до Вас о поміч для села Пыхні на Пряшівскій Руси, котре было заляне в наслідстві сильных дощів, а днес заявляме, што в Пыхнях помалы ліквідуют знищыня, котры выкликала вода. До місцевости вкрочыло на поміч і словацкє войско. Як інформувал староста села Юлиюш Баник, роботу при направі доріг продолжуют працівникы Справы і Утримуваня Доріг Пряшівского Самосправного Краю. Робітникы Словацкого Водогосподарского Поднику надале чыстят корыто потока. Позавчера ся прилучыли до помочы і воякы. Як інформувал полномічный Озброєных Сил Словацкой Республикы Штефан Земанович, в Пыхнях помагат 28 вояків з Михаловец, Рожнявы і Пряшова. Староста села додал, же іщы не одважыт ся повісти, кілько буде стояла вода і як долго буде тырвала робота при ліквідациі наслідств залив.

Комерцийны тесты на коронавіруса в Ґорлицях

Oд початку того тыжня є уж можливіст зробліня комерцийного тесту на присутніст коронавіруса про жытелів Ґорлиц і сусідніх місцевости. Таку оферту дає ґорлицкій шпыталь. Што основне, тест може зробити кажда заінтересувана особа. Кошт досліджыня то 400 зл. В тій ціли шпыталь дал офіцияльный комунікат, в котрым можеме м.ін. чытати, што пробкы сут браны в каждый робочый ден од 8.00 до 10.00 год. Особы, котры хотіли бы ся більше дознати про тестуваня, можут контактувати ся телефонічно з ґорлицкым шпытальом. Грошы треба вплатити на банковый рахунок медичной єдиниці. Результат тесту мат быти відомый по 1-2 днях од одданя пробкы. Самособом, хоц ограничыня помалы сут одкликуваны на обшыри цілой Польщы, то мы заохочаме нашых слухачів дотримувати принципів безпекы.

Русиньскій Музей одкрыват выставу про Гапака

Музей Русиньской Культуры в Пряшові інформує, што од заране, 26. червця/юнія, до 30. серпня/авґуста тр. буде доступна выстава під назвом «Штефан Гапак – Ріка часу», на котру сердечні просит. В єй рамках музей рыхтує і стрічу – Медайльон присвяченый Штефанови Гапакови. Стріча одбуде ся 26. серпня/авґуста в просторах інституциі в Пряшові. Маляр Штефан Гапак од 1953 р. аж до часу, коли пішол на пенсию, был выкладовцьом на Педаґоґічным Факультеті в Пряшові і на Університеті Павла Йосифа Шафарика в Кошыцях як ведучый катедры плястичного кумшту. В 1971 р. было му признане званя професора. Вмер в 1997 р. Образувал краєвиды Словациі, головно рідный Земплин, Шариш і Высокы Татры.

ПУЛС вертат на сцены

По перерві выкликаній пандемійом вертат на сцену наш єдиный професийональный русиньскій ансамбль. Піддукляньскій Умелецкій Народный Ансамбль подал радістну інформацию, што зас буде мож обзерати його выступы, першыраз уж в найблизшу суботу, 27. червця/юнія, в місцевости Домаша, што ся находит недалеко од Гуменного. Ден пізнійше, 28. червця/юнія, о 15.00 год. ПУНА выступит в єдным з нашых сел – в Снакові. Зас 5. липця/юлия ансамбль приде з концертом до Орлова при Чырчу. При нагоді інформуєме, што колектив оголосил рекрутацию до своіх ґруп. 1. липця/юлия о 9.00 год. в Театрі Йонаша Заборского в Пряшові одбуде ся перегляд кандидатів. Ансамбль глядат охочых до дівочой і мужской танцювальной ґрупы.