Генрик Миколай Ґурецкій, «З повагом», просит Павел Малецкій – неділя, 20.00 год.

Мастер польской аванґарды ХХ столітя, в сімдесятых роках одновил музику в стили новой простоты, а в 1992 році здобыл світову славу свойом ІІІ Симфонійом, котрой награня продано в чыслі веце як мілийона примірників.

Генрик Миколай Ґурецкій (1993-2010) вродил ся в Черници на Шлеску. Война і тяжкы обставины жытя спричынили, што музичну едукацию міг зачати аж на 19 років. Вчыл ся в сусіднім Рыбнику, пак в Катовицях студиювал композицию.

В творчости зо зламу 50. і 60. років новаторско оперувал сучасныма середками, од додекафонічной музикы по соноростичну техніку. Початок 60. років то процес упращаня звукового языка. Зачал сігати по мотивы з народной музикы, а тіж з музикы минулого в оркєстровых композициях. Початок 70. років то дальша фаза в творчости Ґурецкого. Переважают композициі великых розмірів, найчастійше з хором і сольовыма голосами.

То скомпонувана в 1975 р. симфонія но ІІІ принесла Ґурецкому світову славу, хоц аж по вісемнадцетьох роках од єй написана, завдякы награню ансамблю Лондоньска Симфонієта з солистком Дон Апшоу, платня розышла ся в веце як мілийоновым тиражы на цілым світі, входячы до канону найзнаменитшых творів сумфонічной музикы ХХ столітя.

В дальшых роках скомпонувал шор творів на мішаный хор a cappella з реліґійныма і народныма інспірациями.

В проґрамі почуєте ІІІ Симфонію та «Три творы в давным стили» в выконаню Великой Симфонічной Оркєстры Польского Радия, концерт на клявесин і смыкову оркєстру оп. 40 та популярны композициі од інчых клясиків.