Модернізуют мапы в ґорлицкым

В сідибі староства ґорлицкого повіту прошла в минулым тыжни відеоконференция з головным ґеодетом державы Вальдемаром Іздебскым. Стріча тыкала м.ін. ґеопорталю і необхідности діґіталізуваня мап.

В стрічы участ взяли представникы самоурядів ґорлицкого повіту заінтересуваны діянями, жебы поправити ґеодезийны засобы в реґіоні. Першом частю стрічы была презентация продукту Головного Уряду Ґеодезиі і Картоґрафіі – ґеопорталю. Є то доступне для вшыткых нарядя, завдякы котрому мож зазнаємити ся з мапами терену, на якых зазначено не лем поділ ділянок ци форму терену. Важным елементом сут нп. інформациі о сітях, якы ведут через дану обшыр.

«На жаль мапы не вшыткых ґмін сут вполни здіґіталізуваны» – бесідувал В. Іздебскій. «В вельох примірах, тіж на обшыри ґорлицкого повіту, сут то лем сканы мап» – додал. Ґорлицкій повіт то 83 ґеодезийны части, 24 з них уж змодернізували, а 57 жде на тот процес. Мария Галіньска, директор выділу ґеодезиі, картоґрафіі і катастру повітового староства в Ґорлицях, повіла, што фурт ведены сут роботы звязаны з модернізацийом евіденциі ґрунтів і будинків, але є то залежне од фінансовых можливости.

Тілько што скінчыл ся дальшый конкурс на ведіня робіт звязаных з діґіталізацийом ґеодезийных засобів. Лем три з десятьох части конкурсу оферт на модернізацию повело ся розвязати. Неодолга зачнут ся роботы звязаны з модернізацийом мап для ґміны Ропа – части Ропа, Лося і Климківка та для ґміны Бобова. На тоты роботы выдадут близко 2 млн зл. В інчых частях того конкурсу оферт вказало ся, што выконавці хтіли за свою роботу о вельо більше, як староство може дати або нияк не были заінтересуваны. Так было в примірі мапы тыкаючой части Сяры в ґміні Санкова.