Григорий Куприянович зо звіданями до кандидатів на президента Польщы

Григорий Куприянович приміром Бернарда Ґайды выслал писмо з десятьома звіданями до кандидатів на президента Польщы. Рахує, што одповіди кандидатів допоможут членам нацийональных і етнічных меншын, котры так само сут громадянами польской державы і берут участ в выборах, підняти рішыня, на кого голосувати.

Початком марця інформували сме, што в звязку з надходячыма президентскыма выборами в Польщы Бернард Ґайда, ведучый Союзу Німецкых Соспільно-Культурных Стоваришынь в Польщы, подал писмо зо звіданями до кандидатів на президента Польщы. В писмі тым Ґайда звідувал кандидатів м.ін. о іх однесіня до вельокультуровости і промуваня меншын, реакцию на ксенофобічны поставы ци готовіст до новелізациі закону о меншынах з 2005 рока.

Десят звідань, як десят Божых заповіди

Перед парома днями з подібным писмом звернул ся до актуальных кандидатів на уряд президента Польщы Григорий Куприянович – спілведучый Спільной Комісиі Уряду та Нацийональных і Етнічных Меншын, представник украіньской меншыны.

На початку дає загальне звіданя, як даный кандидат видит місце членів меншын в польскым соспільстві. Звертат він увагу на тото, што дотримуваня прав осіб, якы приналежат до нацийональных, етнічных або языковых меншын, єст стандардом в демократичній державі і што така держава дає можливости до підтримуваня і розвитку свойой достоменности, одмінной од достоменности векшыны соспільства.

Спілведучый СКУтНіЕМ звідує о однесіня взглядом постуляту покликаня інституций культуры меншын, о плянуваны діяня як президента взглядом меншын, о хоснуваня языків меншын ци постулят хоснуваня взглядом меншын тзв. політикы взаімности, значыт узалежняня діянь польской державы взглядом громадян од політикы інчых держав. Куприянович звідує і о потребу забезпечыня меншынам репрезентациі в парляменті. В списку квестий, до котрых хоче Г. Куприянович, жебы однесли ся кандидаты, є і тота звязана з забезпечыньом реалізаций Польщом медженародных зобовязань взглядом меншын.

Брак одповіди

На писмо Бернарда Ґайды з марця тр. дотепер одповіл лем єден кандидат на президента – Шымон Головня. Постава кандидатів міцно контрастує з том, котру презентує актуальна голова словацкой державы – Зузана Чапутова. Перед парома днями, коли в Словациі проходил Ден Русинів Словациі, президентка не лем поздоровила своіх русиньскых громадян з іх святом, але і звернула ся до них в іх рідным языку. Окрем того закликала Русинів підтримувати свою ідентичніст і быти тым гордым.

В своім писмі Г. Куприянович звідує кандидатів о потребу анґажуваня президента в діяня для будуваня в польскым соспільстві атмосферы толеранциі і полной акцептациі взглядом громадян Польщы інчой як польска нацийональности, языка і культуры та взглядом іх стреміня ґу захованю свойой ідентичности.

Кєд котрисый з кандидатів одповіст, писма будут опубликуваны і переданы вшыткым меншынам.

Фот. за: Меншынова сторона СКУтНіЕМ