Продовжують в обнові Любовняньского замку. Літні акції суть напланованы

Любовняньскый музей в Старій Любовні, котрый справує Любовнянськый замок, на літо приготовив богатый културный проґрам. Єдночасно ся буде продовжовати в реконштрукції ґотічного палаца.

Палац Любомірьскых перешов обновов і актуално ся колавдує, но тот рік іщі не буде навщівникам приступный, інформовав о актівітах директор музею Далібор Мікулик аґентуру TASR.

Літні акції бы ся мали одбыти

Кедьже ся на Словакії увольнюють майже вшыткы рештрікції, котры были запроваджены в повязаню з пандемійов нового тіпу коронавірусу, музей і на тото літо рихтує веце културных подій, котры мають в сканзені під Любовняньскім замком вже свою традіцію. Меджі такы події належать і Свята Кіріла і Методія, котры все проходять в рамках державного свята 5-го юла, але і далшы акції а концерты.

Директор доповнив, же в сканзені знова приготовили День меду, Губертовскы святкованя ці презентацію ремесел предків. Но приготовлены суть і новоты. Наприклад чітаня приповідок в деревяных хыжах, котры суть в сканзені ці на соломі. Много деревяных хыж, котры суть в сканзені, походить з русиньскых сел Старолюбовняньского окресу, своє місце там нашла і деревяна церьков з Матисовой. Про дорослых приготовлюють подію під назов Жывот на селі почас вечора і ночі.

Інвестічны проєкты і наперек сітуації

Музей ся так само залучів до дотачной сістемы Міністерства културы Словацькой републікы про зневыгоднены ґрупы і выпрацовав ся проєкт на вытворіня простору в сканзені про діти з автізмом.

Утримованя 42-ох обєктів – замку, котрый має в справі Любовняньскый музей, є подля слов директора складным процесом. Моментално ся забезпечують великы выпадкы мурива, старають ся о деревяны хыжы і ареал, котрый має сім гектарів. Музей в децембрі 2020-го року зробив і проєкт про жадость фінанцій з норвеґійскых фондів на конзервацію і презентацію воєньскых касарень замку, а так само про стабілізацію северовыходной стіны замку.

Мікулик додавать, же навщівность словацькых музеїв, ґалерій, градів і замків є важнов проблемов і думать, же то так буде і почас слідуючого року. „Є то барз складне, кедьже грошы од навщівника творили некомпензовательну часть розрахунку. Вікенды суть на замку і в сканзені барз добры. Но робочі дні, кедь ходили школьскы заязды і польскы турісты, суть натеперь майже нуловы,“ сконштатовав про аґентуру директор.

Жрідло фотоґрафії: Любовняньскый музей.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫК