Сумар дня на 5. червця/юнія 2020 р.

Приносиме  вам  сумар  медияльной  ґрупы  ЛЕМ.фм+  на ден 5. червця/юнія 2020 р.

Одсвяткуют Ден Русинів Словациі

Містна Орґанізация Русиньской Оброды на Словациі буде орґанізувала в Меджелабірцях празднуваня Дня Русинів Словациі. Подія зачне ся 12. червця/юнія о год. 15.30 святочным переходом через місто, початок під Містным Урядом. В дальшым проґрамі торжества є одспіваня русиньского і словацкого гымнів під таблицьом на Домі Культуры, выступліня гости, дале – деклямация і спів школярів та ґрупы Лабірскы Бетяре. Вчас тырваня свята буде мож придбати русиньскы книжкы ци сувеніры. Кєд хвиля не буде добра, то празднуваня пройде в сали засідань Містного Уряду. Русины жыючы на Словациі выбрали на ден свого нацийонального свята дату 12. червця/юнія, як одкликаня ся до даты Днів Руской Культуры, котры проходили на Пряшівщыні в меджевоєнным періоді, особливо до святкувань з 1933 рока, коли в центрі Пряшова одкрыли памятник Александра Духновича.

Молоды рільникы можут старати ся о дофінансуваня ґаздівок

Аґенция Реструктуризациі і Модернізациі Рільництва в Польщы оголосила набір внесків в проґрамі «Преміі для молодых Ґаздів». Од 3. червця/юнія молоды рільникы, котры хотят розвивати свою ґаздівку, можут старати ся о дофінансуваня. Признавана квота то 150 тис. зл. Підпору можут достати особы, котры м.ін. мают менше як 40 років, ґаздівком занимают ся не долше як 2 рокы, мают одповідні квалифікациі, а іх ґаздівка має не менше як єден гектар. Необхідным до зложыня внеску є бізнесплян. Фінансуваня в цілости буде мусіло быти перезначене на ведіня ґаздівкы або зрыхтуваня до продажы вытворюваных продуктів. Мінімум 70% квоты треба выдати на інвестицию в тырвалы середкы. Проґрам дофінансуваня з рока на рік тішыт ся штораз векшым заінтересуваньом, то уж його шеста едиция. Минулого рока внесків было веце як 7 тис. Час на присыланя внесків в тій едициі минят 1. серпня/авґуста.

Хто різбит?

Професийны і непрофесийны творці, якы жыют на обшыри Карпат, не лем з Польщы, але і сусідніх держав, прошены сут до участи в конкурсі «Сучасна Карпатска Народна Різба в Камени». Орґанізаторами конкурсу сут: Округовый Музей в Новым Санчы та Реґіональный Осередок Культуры в Бєльско-Бялій. Задачом подіі є підтриманя загыбаючой традициі в обшыри народной різбы в камени та розпознаня актуального стану той обшыри штукы в Карпатах. Додатковом вартістю буде, што выбраны різбы трафлят до колекциі музею. Вшыткы творці прошены сут зголошувати своі роботы (може іх быти максимальні шіст, свобідна тема) в терміні до кінця липця/юлия. Найліпшы різбы запрезентуваны будут на поконкурсовых выставах орґанізуваных зимом того рока. Сума нагорід і выріжнінь в конкурсі выносит 15 тис. зл.

До ліса за грибами!

На конец інформация для любителів збераня грибів – в лісах Нижнього Шлеска появили ся уж першы козакы і невеликы правдивкы. Хоц початок яри был барз сухій, то в маю кус поляло, а тото розбудило грибню. О першых місцях з грибами поінформувало перед парома днями Надлісництво Валбжых, пак зачали появляти ся інформациі о дальшых місцях, де уж найти мож козакы, маслякы ци підпенькы. Од років околиці Польковиц і Пшемкова тішат ся славом, кєд іде о кількіст грибів, якы гын вырастают. Любителі грибовых прогульок по лісі, якы жыют на заході, можут сой сміло плянувати вікенд близко природы. В найгіршым выпадку скінчыт ся він на милым спацері, а кєд допише щестя – буде мож принести додаток до обіду.