Музей Никыфора в Креници одкрытый. Оголошено конкурс з нагоды 125. річниці народин артисты

Ограничыня спричынены пандемійом коронавіруса постепенно сут зниманы. Так в послідню суботу наново был одкрытый креницкій Музей Никыфора.

В звязку з тым, што в тым часі споминаме на 125. річницю народжыня Епіфания Дровняка, Креницкій Центр Культуры оголосил плястичный конкурс про діти і молодіж під назвом «Наш Никыфор».

Музей діє, але з ограничынями

В суботу, 23. мая, Музей Никыфора в Креници, будучый частю Округового Музею в Новым Санчы, был наново одкрытый для одвиджаючых. Зышло ся того з 125. річницьом народин артисты, яка проходила 21. мая 2020 р.

Хоц музей старат ся вернути до того, што было перед пандемійом, то мусят быти дотримуваны деякы ограничыня і безпека. Очывидно вхід до музею єст можливый лем з охоронном масочком. Подібні як в інчых того рода інституциях, треба тримати мінімальный 2-метровый дистанс од інчых осіб.

Oдвиджаня експозициі проходит без коментаря провідника ци можливости хоснуваня дотыковых екранів, так жебы як найвеце ограничыти евентуальне розношыня мікробів і тримати безпеку.

Окрем креницкого одділіня Округовый Музей в Новым Санчы уж на початку мая одкрыл наново етноґрафічный парк, а перед парома днями і Пієніньскій Музей в Шляхтовій.

Конкурс памяти Никыфора

В звязку з 125. річницьом народжыня артисты, Креницкій Центр Культуры просит діти і молодіж брати участ в плястичным конкурсі «Наш Никыфор». Цілю ініциятивы єст запрезентувати молодому поколіню творчіст того великого маларя примітивісты.

Зато конкурсовы роботы мусят тыкати ся творів Никыфора, але не мусят быти лем малюваны, техніку конкурсовых прац выберают самы молоды артисты. Конкурс поділеный є на три віковы катеґориі. Перша з них то предшколя, основна школа клясы 1-3 та 4-8. Знимкы або сканы прац треба послати на адрес koncerty@ckkrynica.pl до 31. мая.

Кажда робота мусит быти описана згідно з вымогами орґанізаторів. Конкурс выграт праца, котра в днях од 1. до 8. червця/юнія на офіцийным фейсбуковым сайті КЦК отримат найбільше чысло реакций.