Сумар дня на 19. мая 2020 р.

Приносиме вам сумар медияльной ґрупы ЛЕМ.фм+ на ден 19. мая 2020 р.

Модерна альтернатива тогорічного Кромер Фестіваль Біч

Тогорічный Кромер Фестіваль Біч плянуваный на остатній вікенд липця/юлия не одбуде ся в традцийній формі, што не означат, же нияк го не буде. Орґанізаторы, тзн. Ґміна Біч та Бічскій Культурный Центр, в тых тяжкых для культуры часах поставили на модерны розвязаня і так тогорічна, 6. уж едиция фестівалю одбуде ся в віртуальній формі. В тот спосіб продолжана буде ідея та спільне прожываня музичных емоций, при дотриманю безпекы публикы. Прошены артисты, зо взгладу на тугу за концертуваньом, з охотом згодили ся на таку форму выступів. Трансмісия онляйн з концертів проходила буде од 24. до 26. липця/юлия, а можлива буде завдякы офіцийным інтерентовым сайтам фестівалю. Така форма дозвалят не лем брати участ і смотрити концерты нажыво, але тіж вертати до відео, коли лем приде на тото охота. Є то єдно з першых того рода модерных альтернатив. Трансмісия буде м.ін. з Парижа, Берліна, Варшавы і очывидно з Біча. Актуальный проґрам фестівалю оголошеный буде в найблизшым часі.

Час пандеміі не перервал працы малопольскых самоурядів

В часі вынятковой стрічы, бо веденой онляйн Краківскым Технолоґічным Парком, офіцийні зачато проєкт «Стандарды обслугы інвестора в Малопольщы». Проєкт направленый єст на 85. територияльных єдиниц самоурядів з цілой Малопольщы, в тым тіж Ґорлиц. Цілю задачы є піднести якіст услуг для локальных підприємців заінтересуваных діяльністю в реґіоні та промувати ґміны і повіты як місця добры до локуваня інвестиций. В рамках проєкту находит ся аналіза школіньовых потреб а пак орґанізация школінь, студийных стріч, а аж і індивідуальне даваня рад. Діяня тоты мают на ціли збільшыти чысло новых інвестиций в реґіонах, котры берут участ в проєкті, та загальный економічный розвиток. Проєкт веденый єст Краківскым Технолоґічным Парком та Малопольскым Воєвідством з Европейскых Социяльных Фондів.

Парк мініятур в Ропі потрібує як найскоршой реновациі

Парк мініятур в Ропі, єдно з найбільшых атракций Низкого Бескіду. Парк возник в 2012 р. і є результатом спілпрацы Стоваришыня Погранича з Ропы разом зо словацкым партнером (Hornošarišské Osvetové Stredisko) з Бардийова в рамках проєкту «Архітектура Низкого Бескіду в мініятурі». Рахуюча 40 мініятур експозиция выконана была Янушом Кулиґом, ремісником з Хмельника. Вшыткы представлены будовлі находят ся в Низкым Бескіді по обох странах границі. Сут то головні церкви і костелы м.ін. з Ганчовой, Санковой, Ялинкы ци Фрічкы, але сут тіж три загороды – лемківска мазярска в Лоси, погіряньска з околиц Ропы і загорода з околиц Бардийова. На жаль презентуваны мініятуры не сут в найліпшым стані. Конечна є реновация, котра охоронит іх перед цілковитым знищыньом. Парк доступный є для одвиджаючых цілый рік, а вступ до него є дармовый.

В Мушыні новы атракциі

Сенсорична загорода в Мушыні має новых жытелів. Парк одкрытый минулого рока тішыт ся популярністю, особливо тепер, коли квитнут ріжны рослины. Поділеный єст на 8 стреф, з котрых кажда діє на іншы смыслы одвиджаючых загороду. В єдній зо стреф вказали ся новы атракциі, ходит о стрефу звуку, де од недавна жыют сміючы ся кукабары. Є то ґатунок середньой велькости птаха з родины зимородковых. Натуральні прожывают какабары в Австаралиі. До парку птах был привезеный з Тасманіі. Зо взгляду на голосны звукы, якы выдає, разом з рештом птахів м.ін. з лебедями, павами ци папуґами принесе чудовы звуковы одчутя одвиджаючым загороду в Мушыні.