Сумар дня на 13. мая 2020 р.

Приносиме вам сумар медияльной ґрупы ЛЕМ.фм+ на ден 13. мая 2020 р.

Треба помочы при ремонтуваню церкви в Перегримці

Од парох дни на сайті zrzutka.pl ведена є колекта грошы на ремонт лемківской церкви в Перегримці – конкретні на консервацию престола та поліхроміі західньой стіны. Вірны православной парохіі церкви св. Михала Архангела в Перегримці то нечысленна ґрупа, але уж од парунадцетьох років ведут успішны діяня, жебы комплексово выремонтувати церков. Завдякы стараням пароха о. Романа Дубеца повело ся здобыти з Уряду Ґміны в Осєку Ясельскым та з Підкарпатского Уряду Охороны Памятників дотацию на зробліня выміненых скорше робіт. Дотация выносит 45 тис. зл, але жебы не треба было звертати урядам грошы, треба зобрати іщы додатковых 20 тис. зл. Роботы при поліхроміі та престолі сут необхідны зо взгляду на поступуючу деґрадацию малярской стурктуры та діяня жуків дровноідів. Хто лем має охоту помочы і доложыти ся до консерваторскых робіт, може тото зробити, вплачаючы яку-небуд суму на сайті колекты. На 20 тис. зл 15 осіб вплатило дотепер близко 1700 зл.

І лемківска молодіж буде могла ся дошкаляти

Початком мая війт ґміны Санкова Малґожата Малух підписала догваріня з Малопольскым Центром Підприємства в Кракові на реалізацию проєкту «Академія Компетенциі». Цілю задачы є реалізувати додатковы едукацийны занятя для діти і молодежы, допосажыти предметовы працовні ци купити експериментальны пакєты. В рамках проєкту кваліфікациі підносити будут тіж учытелі. Для них передвидує ся участ в школінях і подимпломовых студиях. Для школярів додатковы занятя обнимают вырівнавчо-дидактичны занятя з математикы, фізикы, хіміі ци анґлицкого языка. Окрем того будут ведены варштаты з розвиваня креативности, певности себе, знаня спілпрацы в ґрупі, вчыня ся і хоснуваня дидактичных е-помочы. На реалізацию проєкту ґміна здобыла близко 1 млн 300 тис. зл, котры трафлят до освітовых інституций на єй обшыри, сут то школы в Санковій, Сярах, Мацині Великій і Бодаках.

Не поіхаме Никыфором на цілій трасі

До кінця мая обовязувал буде зміненый розклад ізды потягів реалізуваных через Малопольску Желізницю на трасі Тарнів-Крениця. Введена є замінна комунікация в звязку з модернізацийныма роботами, котры реалізуют Польскы Желізницьовы Лениі. В місце потягу треба всісти до автобуса, вызначеных є 40 місц. Курсы, котрых тыкают зміны, обнимают потягы Лях, Дунаєц, Никыфор, Долина Попраду. Така ситуация потырват до 29. мая. Дальше завішены сут потягы, котры курсуют до і з Ясла.

Уці вернули на бескідскы лукы

Хвилю тому зачал ся тогорічный весняный редик в Низкым Бескіді і Бєщадах. В звязку з сушом, веґетация ся кус опізнила, але уж вшытко вернуло до нормы. Станіслав Кутина зо Звзяку Годовців Овец і Кіз в Саноку подал, што подібні як в попередніх роках при колибах выпасати будут близко 6 тис. овец, част то уці привезены з Підгаля, а част належыт до місцевых ґаздів. В каждій колибі стадо чыслит од піл до 1,5 тис. штук. На гірскых паствисках уці будут до початку осени. Будут іх выпасати м.ін. в околицях Нового Лупкова і Крампной. Уці, котры сут гын триманы, то головні польска гірска уця. Бере ся з ней скору, волну, мясо ци молоко до молочных выробів. Звірята пристосуваны сут до низкых температур і долготырвалых опадів.

Не лем зимом атракциі на Маґурі

За місяц мают скінчыти роботы на Маластівскій Маґурі, де орґанізуют Парк Родинной Рекреациі. При выжній стациі вытягу вознесли уж видокову плятформу, два біваковы задашыня, поставили лавкы і столики та зорґанізували стежку здоровля. Неодолга скінчат пляц забав. З верха іде убочом стежка здоровля з ґратьом до рекреациі, в половині червця/юнія буде мож з того скорыстати. Ціліст буде огороджена і освітлена. Інвестиция, котру реалізує ґміна Санкова, то кошт кус веце як піл млн зл.