Ювілейна Лемківска Ватра на Чужыні перенесена на осін

Лемківска Ватра на Чужыні проходила од років в першый вікенд місяця серпня/авґуста. Того рока, як заявило Стоваришыня Лемків, з причыны розвитку пандеміі коронавіруса, ювілейна 40. Ватра не одбуде ся в наплянуваным скорше терміні.

Нова дата тогорічной Лемківской Ватры то 12. вересня/септембра 2020 р. Не лем дата была покля што змінена, але тіж тото, што подія буде тырвала лем єден ден, а не як по інчы рокы – два – проходила в пятницю і суботу.

Пандемія змінят пляны

Головный орґанізатор подіі не мат інчого выходу. Покля держава підтримує рестрикциі, того рода масова імпреза не може одбыти ся в перше рішеным терміні і на таку скалю. Таку інформацию передал нашій редакциі ведучый Стоваришыня Лемків Андрий Копча. «Пропоную запалити 40. Лемківску Ватру на Чужыні в суботу 12. вересня/септембра 2020 р. в само полудне», поінформувал.

Заєдно додал, што треба мати на увазі, же і тота осіння дата не єст певна. «Нихто з нас не знат, як буде выглядала ситуация о два-три місяці. Може быти так, што буде мож деякы імпрезы орґанізувати, може з ограничыньом до чысла участників, а може быти так, што нияк ювілейна Ватра не одбуде ся того рока», коментує з непокойом Копча.

Вартат спомнути, што Стоваришыня Лемків плянувало на тот рік зрыхтувати проґрам ювілейной Ватры богатшый як в попередніх роках. Орґанізаторы мали в плянах запросити выконавців, котры в попередніх едициях найвеце запамятали ся публиці. Іщы під конец минулого рока власти Стоваришыня Лемків рахували на більшу дотацию, в тым з головного джерела фінансуваня – Міністерства Внутрішніх Справ і Адміністрациі.

Кєд не тепер, выпаде єден рік

Як підчеркнул Копча, кєд 40. Лемківска Ватра не буде могла одбыти ся в тым році, просто выпаде єден рік, а ювілейна подія буде зорґанізувана уж в 2021 р.

Стоваришыня Лемків пару дни тому поінформувало о одкликаню і інчой свойой подіі – ХІ Медженародного Бієнале Лемківской/Русиньской Культуры, котре мало ся одбыти в маю тр. Як сме уж інформували, подія вступно была перенесена на жолтен/октобер 2020 р.

Кєд подіі ся не одбудут, Стоваришыня Лемків буде мусіло звернути признаны МВСіА дотациі на поєдны імпрезы. В такій ситуациі може найти ся вельо меншыновых орґанізаций в Польщы, котры сут фінансуваны з державных середків. Пандемія коронавіруса і припустна нецікава фінансова ситуация державы в будучности може влияти на высокіст признаваных ґрантів на задачы в 2021 р. Тото тіж може быти наступным проблемом в діяльности меншыновых орґанізаций, такых як примірно Стоваришыня Лемків.