«Слово» – Неділя розслабленого – неділя, 9.00 год.

Пережываме пасхалный час. Час радости з воскресіня. Днешня неділя якбы на першый погляд одходила од темы воскресіня. Говорить о выздравліню невладного чоловіка, котрый лежав тридцять вісем років невладный. Ісус його находить і звідує ся: Хочеш быти здравый?

Тот хворый му одповів: Хочу, Господи, но не мам чоловіка, котрый бы ня зніс до воды. Бо ангел божый сходив на часы до воды і колотив воду. А першый, хто зышов по сколочіню воды, быв выздравленый із каждой хвороты ці терпіня.

Хоць там было много хворых, сліпых, сухорлявых, но Не было никого, бо каждый лем на себе думав. Там пановав еґоізм. Атмосфера нелюбви, недоброжычливости. Каждый хотів лем чімскорше ся дістати до воды, не думав на другого, жебы йому помочі.

Ісус указує, же він мать о нього інтерес. Він пришов на землю не про свої інтересы, повнити свою волю. Але пришов про нас. Мать час на каждого. А так тот невладный хоць не мав никого із людей, но мав Бога, котрый йому говорить: Встань, берь свою постіль і ходь.

Потім його Ісус нашов в храмі, де быв подяковати Богу за своє выздравліня. Ісус йому давать слово напомянутя: Мерькуй, не гріш веце, жебы ся з тобов не стало дашто гірше. Ісус йому не грозить, але як люблячій, напоминать.. Так як указав, же му залежыть на тім чоловікови, коли говидів лежати в овчій купальні; так і теперь указує, же йому залежыть на здравлю його душы: Мерькуй, не гріш веце…

Днешнє слово нам указує, же Ісус Хрістос мать інтерес о каждого чоловіка, каждого хоче спасити. Но напоминать і нас: Мерькуй, не гріш веце. Указує нам, же гріх є то, што може спричинити дашто гірше як было терпіня того невладного. А то вічну погыбель в аді, в проклятю, в оддаліню од Бога. Хрістос воскрес!

В неділю, 10. мая 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 10. мая о 12.00 год. і 11. мая о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА