«Говорить Пряшів» – пятниця, 18.10 год.

Тыжден минул так скоро, же ани не знатя коли. Помалы вшыткы вертаме до «нормальности». Штораз меньше бесідує ся в середках масового переказу о пандеміі коронавіруса, а штораз веце о тым, як одбудувати тото, што уж встигло счезнути. Але, радийо, телевізия і вшыткы інчы того рода все сут в добрій ситуациі, шак высылати треба.

Лемкы мают своє радию. Оно не захворіло, нич му не вадит. Высыламе постійно про Вас, знаючы, што лем «жыве» радийо, з проґрамами ден за дньом, має сенс быти. Не обертаме ся за інчыма. Музика не старчыт, жебы робити радийо.

Як раз ЛЕМ.фм то місце, де музикы єст вельо, але вельо єст і того другого – проґрамів. Од парох років барз добрі складат ся нам спілпраца з камаратскым русиньскым радийом Русин.фм з Пряшівской Руси. Спілпраца тота дає можливіст выміны поглядів, думок, але тіж выміны проґрамів. Прото днес, традицийно як при каждій пятници, дайте запросити ся на премєрову передачу зо самого Пряшова. Того нашого славного центру.

В днешнім «Говорить Пряшів» зачнеме од Культурного Калейдоскопу. Є він інчый як тоты, до котрых сме привыкли, понеже повіме в ним, як мож ся культурно розвивати в своім домашнім обыйстю. В Історичным Календари спомнеме на Павла Цібере, правника і русиньского політика з Підкарпатской Руси. Про Лемковину основны будут спомины на єдного з найвызначнійшых русиньскых малярів – Никыфора Креницкого (Епіфана Дровняка).

Окрем того не бракне Книжниці.фм, Припоминкы і інчых постійных части проґраму.

Зачынаме хвилю по Новинах ЛЕМ.фм, о 18.10 год.