Сумар дня на 06. мая 2020 р.

Приносиме вам сумар медияльной ґрупы ЛЕМ.фм+ на ден 05. мая 2020 р.

Вдячніст за вірніст 

В неістнуючым русиньскым селі Велика Поляна в окресі Снина, де вродил ся кошыцкій грекокатолицій єпарха Мілан Хаутур, одбыла ся в неділю, 3. мая, споминова подія. На бывшым церквиску єпископ посвятил новый престол і памятну таблицю з нагоды 70. річниці ліквідациі Грекокатолицкой Церкви в бывшій Чехословациі. В проповіді владыка припомнул тяжкы часы, котры пережыли люде по так званым Пряшівскым Соборі, лем зато што хотіли остати грекокатоликами. Цілю недільного богослужыня было выразити вдячніст родаків своім предкам за іх вірніст Грекокатолицкій Церкви в часі тоталітарного режіму. Парохія в Великій Поляні была єдном з тых, котры примушены были пережывати і передавати свою віру 18 років без присутности свого священника. Споминова подія мала быти злучена зо шторічном стрічом родаків, але в звязку з обовязуючыма рестрикциями в часі панедміі соспільно-культурны подіі не можут быти орґанізуваны. Богослужыня проходило без участи вірных.

Буде знатя, што є якістне і вартат купути або схоснувати

Фундация Aevis і партнеры будут признавати знак якости «Полонины – нереально реальны». Причына така, жебы туристы, котры будут приходити в реґіон Полонин – пілнічно-східньой Словациі, могли легко ідентифікувати якістны продукты і услугы, што реалізуваны сут на місци в навязаню до локальной традициі. Продукты і услугы, котры можут старати ся о признаня знаку якости «Полонины – нереально реальны», можут быти звязаны з вельома голузями економікы, можут то быти традицийны ремісничы выробы, ідло, услугы звязаны з закватеруваньом ци інчы – важне, жебы одкликували ся до локальной традициі і териториі. О признаня знаку якости мож старати ся до 15. червця/юнія тр. Можут ся о него старати лем продуценты і услугодавці з обшыри Полонины, котра обнимат цілый окрес Снина та част окресу Собранці. Партнерами фундациі Aevis в проєкті сут: місто Снина, Областна Орґанізация Туристичного Руху Вышній Земплин і Вышній Шариш, Справа Нацийонального Парку Полонины і Frankfurt Zoological Society.

До почытаня на таблеті, компутері ци в телефоні

Новинарско-выдавнича аґенция «Рускє Слово» в навязаню до конечности социяльной ізоляциі в борбі з пошырюваньом ся коронавіруса збільшашт зміст свойой діґітальной колекциі. Безплатно удоступнят чытачам в версиі пдф три публикациі. Сут то: книжка з приповідками Ірины Гарди Ковачевич «Небо над Керестуром», котра є бестселером серед Русинів Войводины – печатана в 2012 році розышла ся в цілости в двох тиражах, дальшом книжком з приповідками до почытаня в діґітальній версиі є книжка авторства Славомира Олеяра «Насіня» та роман Івана Медєші пн. «Спацеры по сподку Дунца». Зазерайте на сайт knjizkiporuski.com.

Русиньскій Фестіваль буде, але пізнійше

Згідні з тым, што бесідувал в половині квітня/апріля в інтервю для нашой редакциі Мілош Стрончек, директор Русиньского Фестівалю во Свиднику, з початком мая вырішыли, што з терміном тогорічной едициі подіі. В звязку з тым, што ани кінцьом мая не буде можливе орґанізувати фестіваль, переносят термін на тыжден од 14. до 20. вересня/септембра тр. Особы, котры скорше купили білеты, не мусят іх оддавати, будут они дале важны. Вшыткы рыхтуваня до тогорічной, 8. едициі Русиньского Фестівалю во Свиднику были завершены уж кінцьом минулого рока, зато рестрикциі, котры пришли в марци і квітни/апрілю, досягли орґанізаторів уж кєд іде о дату, коли буде мож зреалізувати подію. На тот момент орґанізаторы не берут до увагы перенести го на будучый рік, рішыли перенести подію на осін з надійом, што до того часу вшытко верне уж до нормы.