Ровером з Мушыны до Нового Санча уж в червци/юнію

Соймик Малопольского Воєвідства передал близко три млн зл на будову полудньового одтинка роверовой трасы EuroVelo 11, якій іде вздолж Долины Попраду. Тырвают роботы медже Мушыном а границьом державы і Миликом а Андриівком та при будові двох польско-словацкых лавок на ріці.

«Будова зінтеґруваной сіти роверовых трас в малопольскым воєвідстві EuroVelo 11, етап ІІ вздолж Попраду» то вельолітня робота. Початком 2017 рока Малопольща передає Мушыні 2 млн зл. Фінансова поміч потрібна была при реалізациі задачы Проґраму Трансграничной Спілпрацы Інтерреґ Польща-Словация 2014-2020 фінансуваного унійныма фондами. Дотация Малопольского Воєвідства была збільшена іщы о веце як 5 млн зл в 2019 році.

Ціліст трасы Мушына-Новый Санч чыслит 45 км, а бракуючых 12 км зроблят до червця/юнія. Траса з Мушыны до Пивничной іде раз по польскій, раз по словацкій страні. Біциґлисты будут мати нагоду іхати видоковом трасом Долином Попраду. Разом з реалізаторами трасы по словацкій страні проблем переправы через воду розвязано побудуваньом двох лавок над ріком: Леґнава-Милик та Андриівка-Малый Липник. Траса мала быти скінчена до кінця попереднього рока.

«Пропонуваны будовляныма фірмами кошты зрыхтуваня роверовой трасы были на вельо більшы як нашы можливости» – повіл Влодзімєж Токарчык, заступця бургомайстра міста і ґміны Мушына. «Коли зорґанізували сме черовый конкурс на выконавцю, уж сме не были в силі скінчыти робіт до кінця 2019 рока і розрахувати дотациі, одтале веце як два млн зл мусіли сме вернути до буджету воєвідства» – додал. Ґміна внескувала єднак до власти реґіону зробити анекс. Неодолга до ґміны трафит близко 2 млн 825 тис. зл на реалізацию задачы в тым році.

«Ровер єст безпечном і здоровом формом активности. Вартат припомнути, што в Малопольщы реалізуваный є найбільшый проєкт будовы біциґльовых трас з европейскым стандардом VeloMałopolska. До ізды оддано уж близко 600 км трас, побудувано 6 великых і парунадцет меншых мостів і лавок. До того доходит більше як 3 000 роверовых пути з ріжным ступеньом трудности, по котрых мож уложыти сой ріжны біциґльовы пути» – підсумувал Томаш Уринович, віцемаршалок реґіону.