Біциґльом по новых путях Крениці і єй околицях

Крениця як курортне місто од років притігат не лем особы, якы хочут лікувати ся в здрою, але тіж туристів, якы глядают місця, де мож одпочати. Ціла обшыр Лемковины єст найліпшым місцьом, жебы забыти на містецкый шум, одыйти думками од бізнесів і роботы і заняти ся собом і приємно схоснувати вільный час.

Прото тіж Крениця, а радше єй власти од років розвивают тото, што про туристичный рух основне – атракциі. Єдном з такых сут напевно біциґльовы трасы, котрых неодолга в Креници і околицях прибуде.

Хоц і Польщу заатакувала пандемія коронавіруса, котра так скоро ся не скінчыт, Крениця як раз на сам початок майового вікенду рыхтує ознакувати близко 100 км біциґльовых трас. На шутровых дорогах доданых буде сім новых пути зрыхтуваных для гірскых біциґльовых спортів. З Парковой Горы будут три трасы ендуро. Што цікаве, вшыткы трасы зачынают ся на креницкым дептаку. То тіж основне, прото што до Крениці мож прити неконечно своім автом. Старчыт высісти на стациі, або выйти на автобусовым пристанку.

Трасы сут названы так як місцевы мінеральны воды. Ідут через істнуючы перше лісны дорогы. Найдолша з них має 22 км, а на найкоротша нецілых 5 км. Трасы тягнут ся докола Парковой Горы, Яворины і популярной стежкы в коронах дерев, котра была одкрыта не так давно.

Серед побудуваных трас сут тіж стежкы для екстремальных біциґлистів – стежкы ендуро. На обшыри Парковой Горы сут три такы трасы – долгости од 1110 м. до 1300 м. Єдна з них веде бывшым тором для сань. Тоты екстремальны зъізды сут єднонапрямовы.

Што цікаве, трасы ендуро можут быти хоснуваны не лем через роверистів. Будут мочы ходити по них любителі нордік вокінґ, а зимом любителі біговых нарт і скітурів. Пропозиция одкрытя новых трас была радо принята креницкыма властителями готелів і пенсийонів. Приіздны уж долшый час звідували про того рода атракциі.

Крениця лежыт в долині медже высокыма горами, при тым доходит дост густа забудова, прото выникла потреба побудуваня біциґльовых пути і в сторону сусідніх місцевости. Єдна з трас іде з Крениці через центр Мушыны до Жеґєстова, а дале на Пряшівску Русь.