Сумар дня на 22. квітня/апріля 2020 р.

Приносиме вам сумар медияльной ґрупы ЛЕМ.фм+ на ден 22. квітня/апріля
2020 р.

Словацка політика взглядом меншын

Без взгляду на пануючу пандемію коронавіруса, нововыбрана словацка влада, зобовязана конституцийом Словацкой Республикы, мусіла до 20. квітня/апріля зложыти своє проґрамове выголошыня. Документ, котрый має вказати пріоритеты на 4-річный функцийный період, влада схвалила в неділю, 19. квітня/апріля. В выголошыню находят ся і темы повязаны з меншынами. Нова влада хоче дале підпорювати і хоронити своіх жытелів, якы сут представниками меншын. Хоче м.ін. отворити дискусию про зорґанізуваня Уряду про Нацийональны Меншыны, котрый пильнувал бы дотримуваня внутрішньодержавных і медженародных обовязків Словацкой Республикы взглядом меншын. Окрем іншого нова влада хоче іщы зліпшыти якіст меншынового вчыня і заняти ся культуром. Хоче м.ін. вытворити леґіслятивны рамкы на забезпечыня розвитку культуры членів нацийональных меншын, забезпечыти в рамках публичных грошів функцийонуваня професийональных театрів, музеів ітп., а тіж выниканя новых культурных інституций.

Біциґльове міточко, дороговы інвестициі, допосажыня ҐЦК-а. Вельо діянь в Ґорлицях

В Ґорлицях реалізувати будут новы інвестициі. Рушыла будова біциґльового місточка, а два дороговы проєкты достали дофінансуваня Фонду Самоурядовых Доріг. Роверове місточко фінансуване є з громадяньского буджету та з проґраму реалізуваного Малопольскым Осередком Дорогового Руху в Новым Санчы. Місточко займе 1800 квадратных метрів при улици Стависка, плянуют скінчыти го до кінця червця/юнія. Буде ся на ним мож вчыти принципы дорогового руху, орґанізувати конкурсы з обшыри безпекы на дорогах та орґанізувати еґзаміны на роверову карту. Так само того рока іщы місто хоче зреалізувати дві інчы інвестициі – розбудувати дорогу при улици Карвациянів та побудувати лучник улиці Стружовской з Корчака. Обі задачы нашли ся на основным списку ґмінных задач з дофінансуваньом, котрый принял 16. квітня/апріля Презес Рады Міністрів. Разом обі інвестициі то кошт 2 млн 300 тис. зл. Ґорлицкій Центр Культуры – інституция, яка приналежыт до міста, так само зреалізує нову задачу. Центр Культуры поінформувал, што здобил дофінансуваня, жебы выпосажыти тематичны працовні. Міністер Культуры і Нацийональной Спадковины дал на тоту ціль 85 тис. зл.

Ци нічліговы колибы будут мусіти ся заперти?

Стан епідеміі коронавіруса в першій леніі економічні влинул на такы підметы, котры мусіли стримати свідчыня своіх услуг, медже нима сут і туристичны і нічліговы колибы, якы приналежат до Польского Краєзнавчо-Туристичного Товариства. Кєд Польскє Краєзнавчо-Туристичне Товариство не підтримат ґаздів арендуваных колиб, то наслідством буде катастрофа в туристичній обшыри в Бескідах. Не смотрячы на епідемію і цілковитый заказ принимати гости, арендарі обєктів мусят вносити оплаты за аренды. Банкрутство колиб буде мало влияня на десяткы меншых фірм, затриманы сут замовліня з доставами продуктів і услуг вельох компаній з реґіону. Більшіст арендуючых колибы выступила з писмами до Польского Краєзнавчо-Туристичного Товариства в справі затриманя оплат, але ПКТТ не підняло іщы рішыня в тій справі. Весняны місяці то час рыхтуваня ся до тзв. высокого сезону, з котрого приходы найчастійше дозваляют утримати обєкты в мертвым періоді. В звязку з тым, што не знатя, коли вернут вшыткы ограничыня і верне туристичный рух, не знатя і, ци поведе ся утримати вшыткы колибы.

Быти може зас не буде мож входити до лісів. Вшытко через сушу

По більше як двох тыжнях загальнопольского заказу, од понеділька мож зас ходити по лісах. Лісникы остерігают єднак, жебы дотримувати обовязуючы принципы социяльной ізоляциі і мати на увазі іщы єдно, барз поважне ризико, якє несе за собом суша. В лісах єст барз сухо, а то для лісів велика небезпека. Уж тепер пожарів лісів є більше на тот момент як минулого рока. По вынятково сухій і безсніговій зимі пришла бездощова яр. Стан воды в ріках єст низкій, а опадів практичні неє і в найблизшых тыжнях іх не проґнозуют. Двараз на ден актуалізувана є мапа ризика выступуваня пожарів в лісах, яку публикуют на сайті Дослідничого Інституту Лісництва. На днес властиві в цілій державі выступує найвысшый рівен пожарового ризика лісів. Од початку рока лісы горіли уж 2700 разів. За оген в лісі барз часто одповідальны сут люде – або нароком підпаляют ліс, або сут неосторожны, лишаючы недокурены папіросы ци выпаляючы лукы в сусідстві лісів. На разі лісы во вшыткых 430 надлісництвах Державных Лісів сут отверты. О тым, ци ввести на обшыри котрисого з них часовый заказ входити зо взгляду на пожарову загорозу, рішают поєдны надлісничы.