«Слово» – Пасха Хрістова – неділя, 12.00 год.

Днесь пережываме праздник праздників. Свято світлого Хрістового воскресіня. Ай кедь є днешній день позначеный сітуаційов коло коронавірусу, коли суть заперты двері церьквей. Люде не можуть брати участи в тых чудесных богослужінях.

Не зазвучіть то радостне: Хрістос воскресе із мертвых. Но і так духовно можеме пережывати радость. Тоту радость не вонкашню але внутрішню.

Хрістос своїм воскресіньом розганять темноту, котра настала в часі його роспятя. Сонце ся затмило на три годины. Тым была выражена тота темнота, котра перебывала в людьскых душах. Фарізеї, законознателі, Пілат, Ірод і далшы, котры брали участь в одсуджіню Хріста, торжествовали, радовали ся. Виділи Того, котрому завиділи, котрого ненавиділи, ці котрый про них представляв огрожіня свого поставліня, ці карьєры, як то было з Пілатом. Они вшыткы виділи Ісуса роспятого, і думали сі, же їм належыть побіда. Же уж їм єй нихто не возьме. Но приходить недільне рано. Ісус воскрес із гроба. Ангел звістує женам: Чом глядате жывого меджі мертвыма? Тадь Він воскрес. Ісус ся сам появлять женам і їм звістує: Радуйте ся!

І мы звістуйме тоту радость: Бо од смерти ку жывоту, од землі ку небу нас перевів Хрістос своїм воскресіньом. Не пришов царьовати як земный царь, но пришов нам отворити небо. Пришов зничіти смерть і даровати не земный часный, но вічный жывот. Тото нас мать наповняти радостьов і надійов в часі, коли діавол пробує посіяти в людьскых сердцях безнадій. Прото несьме каждому тоту радостну новину надії тым прекрасным поздравканьом: Хрістос воскрес!

В неділю, 19. апріля 2020 р., о 12.00 год. проґрам «Слово», котрый реалізує єромонах Маркіян, ЧСВВ. Повторіня 19. апріля о 16.00 год. і 13. апріля о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА