Стрончек: Чекаме до зачатку мая, пак вырішыме, што з фестівалом

„Увидиме, што буде. Спринимаме різны алтернатівы. Видиме і то, же люди ся боять,“ говорить Мілош Стрончек, директор Русиньского фестівалу у Свіндику.

Вшытко є приготовлено. Русиньскый фестівал од 1-го марца 2020-го року зачінать продай перманенток на свій 8-ый річник. Дата найвекшого фестівалу Русинів є становлена на 25-го аж 31-го мая. Орґанізаторы на сторінках фестівалу оголошають мена тых, котры будуть выступати на тогорічній сцені.

Уж о пару днів зачінають платити на Словакії строгы рештрікції, котры мають заборонити пошырьованю нового тіпу коронавірусу. Меджі першыма суть заказаны културны події. Коли заказ мине, то днесь нихто не знать.

Ословили сьме Мілоша Стрончека, жебы сьме ся дізнали, в якій фазі приготовлінь фестівалу застигли рештрікції орґанізаторів, і як видить реално реалізацію тогорічного Русиньского фестівалу у Свіднику.

Вшытко є приготовлене

Орґанізація тыждньового фестівалу, котрый має своє завершіня в рамках трьох вікендовых днів на свідницькім амфітеатрі, не є справа єдного місяця. Стоїть за тым ґрупа людей, котры мусять проґрам рішыти омного скоріше. То потвердив і директор фестівалу Стрончек, котрый про нашу редакцію повів, же рештрікції їх застигли втогды, кедь уж было вшытко потверджене.

„Фестівал є веце-менше приготовленый од минувшого року. Тото, што видять люди, то уж лем пропаґація, котра є наставлена од зачатку того року. Значіть, вшыткы тоты рештрікції нам засягли уж лем до даты, в котрій ся буде фестівал робити і до конкретной реалізації. Мы маєме вшытко наставлене, приготовлене, обїднане,“ говорить Стрончек.

Пояснив, же вшыткы інтепреты были доїднаны уж в минулім році. Орґанізаторы слідють сітуацію і чекають, якый буде далшый вывой. Подля того будуть в слідуючіх днях рішыти, што далше.

Алтернатів є веце, може буде фестівал пізніше

Якраз днесь оголосили перенесіня події на слідуючій рік орґанізаторы найвекшого музичного фестівалу на Словакії Pohoda. У Свіднику затля з таков алтернатівов не рахують.

„Одколи ся то ціле зачало (пандемія і односны рештрікції, позн. ред.), інтезівно то слідуєме і аналізуєме. Рішыли сьме, же до кінця апріля іщі все будеме промовати дату фестівалу, котра была напланована од минувшого року. Кедь сітуація буде єднака, або ся буде згіршовати, 1-го мая вырішыме о новій даті, котра буде перенесена о пару місяців пізніше,“ бісідує о моменталных планах директор фестівалу.

Як продовжує, іщі все бы і тота перенесана дата мала быти в такім місяці, жебы фестівал было мож зробити в просторах амфітеатру. Покля ся вырішыть о новій даті, 4-го мая через фестіваловы комунікачны каналы – вебсайт і Facebook, то орґанізаторы офіціално оголосять.

За Стрончековыма словами є зрушіня цілого річнику Русиньского фестівалу у Свіднику крайна можливость. Думать, же ся то не дасть порівняти з фестівалом Pohoda, котрого орґанізаторы з тым роком не рахують.

„Pohoda має вельо загранічных інтерпретів. Там є ясне, же ся тяжко глядать новый термін, жебы вшыткы могли прийти выступати в іншім терміні, як то было доїднане. Мы маєме в проґрамі лем єдного загранічного гостя, іншак суть інтерпреты із Словакії. Значіть, в нас є треба лем єдно, жебы сітуація была добра і жебы подія могла ся робити. Втогды то уж мы будеме знати зреалізовати, і кедь то буде в пізнішім терміні.“

Як повів, майже вшыткых запрошеных інтерпретів вже обтелефоновав і нихто з перенесіньом даты затля не авізовав жадну проблему.

Є то высша міць

І кедь днесь є на Словакії сітуація в рамках можливостей стабілізована, не прибывають великы чісла інфікованых в порівнаню іншыма державами, з пандемійов ся не дасть раховати як з партнером, з котрым ся мож доїднати.

Зато орґанізаторы мусять думати і над алтернатівов, же рештрікції будуть платны омного довше, як бы сьме хотіли. Суть орґанізаторы приготовлены на то, же бы фестівал тот рік не быв? І не зістали бы фестівалу фінанчны обовязкы, котры бы запричінили велику проблему?

„Є то самособов высша міць, може ся стати і то, же фестівал тот рік про рештрікції наконець не буде мож зробити. Але высшу міць маєме і у вшыткых змлувах з інтерпретами. Значіть, платили бы сьме їм покуты, кебы сьме фестівал зрушыли мы свойвольно, бо сьме їх мали обїднаных. Але кедь засягне высша міць, што може быти плана погода, але і такы рештрікції, якы были теперь прияты, вшыткы то мусять акцептовати і змлувы суть анулованы. Зато про нас жадны довгы не выникнуть,“ конштатує Мілош Стрончек.

Додавать, же і з проданыма тікетами бы не была проблема. Кебы ся фестівал мусив зрушыти, каждый може прийти до продайного пункту сіті, котра тікеты продавать, і грошы му будуть вернуты.

Віриме, же вшытко ся назад розбігне

При навщівности тогорічного фестівалу може свою роль мати і страх. І кедь словацька влада поступно буде увольньовати рештрікції а буде мож зорґанізовати фестівал, у многых людей може тырвати даякый час, покля ся на такы події одважать іти. Стрончек вірить, же наперек тому то фестівал не засягне.

„Обговорили сьме і тоту алтернатіву, же бы ся люди бояли іти на фестівал. Слідуєме то, в якій сітуації суть люди. Бісідовали сьме о тім і з інтерпретами. Не знаме, як то буде. Але покля рахуєме з тым, же бы ся вольнішый жывот міг обновити оптімістічно десь в місяці май – юн, так думам, же люди будуть пару тыжднів потребовати на успокоїня, но іщі все бы сьме могли в тых теплішых осінніх місяцях зробити фестівал. Но увидиме, як то реално буде.“

Як продовжує, орґанізаторы видять і то, же люди днесь мають великый страх. „Но мы віриме, же ся сітуація зліпшыть, же то буде овельо ліпше, як то є теперь. Віриме. Перед місяцьом і пів бы сьме ани не подумали, же люди не будуть выходити вонка, але і зато маме надію, же ся то і скоро скінчіть,“ закінчує Мілош Стрончек.

Жрідло фотоґрафій: Русиньскый фестівал.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА