Сумар дня на 14. квітня/апріля 2020 р.

Приносиме вам сумар медияльной ґрупы ЛЕМ.фм+ на ден 14. квітня/апріля
2020 р.

Што находило ся в Лупкові?

В Лупкові, в ґміні Команча, в часі археолоґічных досліджынь в монтажовым пасмі ґазовой сіти Страхотина-Словация одкрыто історичны фундаменты – найправдоподібнійше грекокатолицкой плебаніі, што находила ся при церкви св. Михала Архангела. Дотепер на істнуваня церковного комплексу вказували лем документы і цмонтір, што ся находит недалеко. Рішено, м.ін. беручы до увагы суґестиі власти ґміны Команча та локальных стоваришынь мешканців, же нова ґазова сіт выбудувана буде з выкорыстаньом безвыкоповых метод, што дозволит заховати одкрыты обєкты в незміненым стані. На днес ціла обшыр єст забезпечена і тырвают бесіды з консерватором, што і як дальше робити. Село до войны было вельокультурове. Прожывали в ним Русины, Полякы, Жыды і Циґане. Находячы ся в середині села церков з дзвінницьом і плебанія были описуваны як великы будовлі, што выріжняли ся серед традицийной забудовы. Іх істория закінчыла ся разом з выселіньом в 1947 році, коли жебы затерти сліды істнуваня лемківской культуры, рішено парохію зрівнати з земльом.

Жубрів в Бєщагах прибыват

Добры новины з Бєщадів. Як подал Едвард Маршалек, представник Реґіональной Дирекциі Державных Лісів в Коросні, подля остатньой інвентаризациі в бєщадскых лісах жыє 668 жубрів, а додатковых 9 находит ся в показовій загороді в Мучным. То вказує, же явило ся більше як 100 новых жубрів в однесіню до минулого рока. Звірята прожывают на обшыри надлісництва Лютовиска, де єст найбільше стадо, што рахує 84 жубры, Балігород – з другым найбільшым стадом, 65 жыбрів, а тіж на обшыри надлісництва Тисна, Команча, Ліско і Ступосяны, а поєдны звірята вказуют са на погірю на обшыри надлісництва Бірча, Березів та Красічын. Марек Марецкій, заступця директора РДДЛ підкрислят, же результаты інвентаризациі сут як найбарже докладны зо взгяду на веденый цілорічный моніторінґ стад і єднодньове рахуваня, што дозволило выелімінувати подвійне порахуваня. По реґресиі звязаній з туберкульозом в роках 2013-2014 пришол барз высокій прирост, чому служат лагідны зимы. Єст то барз добра новина, хоцкі науковці апелюют, же в такым темпі неодолга жубрів буде за дуже як на таку обшыр, што буде вело до хворіт і конфліктів. Найліпше для популяциі єст многє чысло малых стад.

Уж знаме што діє ся в Татрах, #tatrypoczekają

Зо взгляду на пандемію і обовязуючый од 3. квітня/апріля заказ входити до лісів і парків, вшыткы любителі гірскых вандрівок сут незадоволены. З той причыны Нацийональный Татряньскій Парк зачал новый цикль фільмів «Голова догоры #tatrypoczekają». Єст то серия едукацийных фільмів, напрявлена радше на старшу публику, яка вказує, што актуальні діє ся в Татрах. О тых молодшых любителях гір тіж подумано. Специяльно для них зрыхтувано кольоруванкы представляючы гірску козицю, волка та пухача, а окрем того серию фільмів з думками як креативні провести час дома – кус забавы, кус знаня. Вшытко доступне єст на офіцийным сайті Нацийонального Татряньского Парку.

Тогорічни матуры пересунени

Як інформувал премєр Польской Республикы Матеуш Моравєцкій в четвер, 9. квітня/апріля, термін тогорічных матур был перенесеный. На тоту хвилю не были поданы ниякы конкретны даты, знатя лем, же еґзаміны не одбудут ся скорше як в другій половині червця/юнія. Матуристы о новым терміні будут поінформуваны на три тыжні скорше. То само тыкат ся еґзамінів осмых кляс ци рекрутациі на учельні, котры тіж сут перенесены в часі. Протягом конференциі премєр заповіл тіж, же по святах уряд запропонує новый плян борбы з вірусом і помалы зачне одкликувати обовязуючы рестрикциі, што має довести до поліпшыня стану економікы.