Музеї і ґалерії Пряшівского краю можете навщівити віртуално

Културны заряджіня, котрых зряджовательом є Пряшівскый самосправный край, можете теперь навщівити віртуално. Словацьку пресаґентуру TASR о тім інформовала Леа Геілова з Одділіня комунікації і пропаґації Уряду Пряшівского самосправного краю.

К діспозіції є веце як десять переглядок. Службу віртуалной переглядкы на своїх інтернетовых строрінках понукать замок Стара Любовня, Кежмарьскый замок, Татраньска ґалерія в Попраді ці Шарішска ґалерія в Пряшові.

Посмотрити собі мож і Варгола

„Навщівници ся можуть перейти посередництвом компютера по дворі замку Любовня. На Кежмарьскім замку про зміну можуть видіти інтерьєр замку, музей културы бываня, но і выставкову салу,“ інофмормовала Геілова.

На вебсайті Татраньской ґалерії в Попраді суть к діспозіції віртуалны переглядкы пятьох експозіцій вызначных умелців – Мірослава Ціпара, Віктора Фреша, Едуарда Овчачка, Ладислава Медняньского і Анны Ондрушековой. Службу віртуалной переглядкы штирьох експозіцій понукать і Шарішска ґалерія в Пряшові. Любителі уменя можуть посмотрити ся на выставкы Штефана Гудака, Штефана Костелнічка, Душана Шолца і Енді Варгола.

Музей на дома

„Музеї, котрых зряджовательом є Пряшівскый самосправный край посередництвом своїх вебсайтів і соціалной сіті Facebook публікують і вызначны збірковы предметы. В збірковім фонді Крайского музею в Пряшові находить ся понад 100 000 збірковых предметів,“ повіла про аґентуру Геілова.

Вігорлатьскый музей в Гуменнім штартує онлайн проєкт про шыроку верейность зо заміряньом на поміч учітелям, родічам, школярям ці штудентам під назвов Музей на дома. На своїй офіціалній сторінці на сіті Facebook, і на офіціалнім вебсайті поступно сприступнить  музей людям нетрадічны погляды до своїх експозіцій і приготовить онлайн актівности про розвиток творчого думаня в области історії, етноґрафії і енвіроменталных тем.

Інтересности о музею, місті Кежмарок і його вызначных особностях розкрывають Історії предметів, котры Музей в Кежмарку реґуларно публікує на своїй інтернетовій сторінці.

Серію статей під назвов Історія збіркы о збірковых предметах музею од їх здобытя аж по іншталацію в експозіції публікує і Любовняньскый музей на своїм вебсайті. Вшыткы актуалны інформації о актівностях музеїв і ґалерій, котрых зряджовательом є Пряшівскый самосправный край, можете найти на їх сторінках на сіті Facebook.

Жрідло фотоґрафії: Šarišská galéria v Prešove.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА