Сумар дня на 23. марця 2020 р.

Приносиме вам сумар медияльной ґрупы ЛЕМ.фм+ на ден 23. марця 2020 р.

Заказуют входити до лісів

Результатом апелю реґіонального директора Державных Лісів єст, же надлісничы праві в цілій Малопольщы і части підкарпатского воєвідства выдали заказы входити до лісів. Офіцияльном причыном єст борба з коронавірусом. Критиком зареаґували на тото еколоґы, активісты і околичны жытелі, якы підкрисляют, што заказы не сут згідны з офіцияльном політиком Державных Лісів. До лісів заказуют входити «посторонным особам», што значыт, же на лісны дорогы дале будут мочы входити лісничы та тоты, што управляют лісами, тє. лісорубы або операторы машын вытинаючых дерева, тіж пожарникы. Заказ входити до лісів дали надлісничы з праві цілой Малопольщы. Ріжнят ся часом, в котрым будут обовязувати. В надлісництвах Бжеско, Лиманова, Мєхів, Мыслениці, Навойова, Новый Торг, Пивнична і Лося заказ буде обовязувал «до одкликаня». Заказу в Малопольщы не дали покля што Ґорлиці, Домброва Тарнівска, Громник, Коростенко і Старый Санч. В Ґорлицях зміны повязаны з пандемійом коронавіруса влинули на стриманя од днес, тє. 23. марця, детальной продажы дерева за готівку для індивідуальных клієнтів. Лісы для одвиджаючых (з ріжных причын) сут тіж закрыты в Великопольщы, в західньопоморскым, любушскым і куявско-поморскым воєвідствах, на Підляшу і Нижнім Шлеску.

Европеада 2020 перенесена

Тогорічна Европеада перенесена на 2021 рік. Федеральна Унія Европейскых Нацийональных Меншын (FUEN) і ґаздове подіі рішыли перенести европейскы змаганя в футболю нацийональных меншын на літо будучого рока зо взгляду на пандемію коронавіруса. Европеада буде проходила од 19. до 27. червця/юнія 2021 рока в Каринтиі. Беручы участ в акциі были уж поінформуваны, а орґанізаторы актуально працуют над зміном часу кватеруваня і транспорту стартуючых. Того рока в змаганях мало взяти участ 24 мужчын і 7 жен, якы репрезентуют 24 меншыны. Европеада то подія, котра має за ціль получыти уцтиву спортову конкуренцию з інтересами автохтонных нацийональных меншын. Найважнійша єст стріча, выміна досвіду меншын та публична промоция.

Одкликаны варштаты лемківскых танців

Одкликаны і варштаты лемківскых танців. Мали они проходити в днях 28-29. марця тр. в Домі Культуры «Імєлін» в Варшаві і обнимати вчыня 15-20 лемківскых танців поділеных на тематичны блокы, коротку презентацию Лемків, іх істориі і характерных примет лемківской культуры. Мало быти представлене і культурове влияня сусідів, ріжниці медже танцями для молодшых і старшых та роля і выгляд лемківского облечыня. Подія тота, як вельо інчых, была одкликана, штобы протидіяти пошырюваню ся коронавіруса.

Лекциі русиньского в РТВ 2

Од днес на другым каналі Радия Телевізиі Войводины будут емітувати дві годины лекций русиньского языка для школярів основной школы од першой до четвертой клясы. Блок зачне ся о годині 9.45 лекцийом русиньского для учеників першой клясы. Лекциі будут тырвати по піл годины. Остатні занятя материньского языка для учеників четвертой клясы скінчат ся піл дванадцетой. Проґрам повторюваный буде заран, в віторок – 24. марця, в тых самых годинах. На каналі РТВ 2 ведены сут тіж днес для діти лекциі словацкого, мадярского та хорватского языків.