Сумар дня на 19. марця 2020 р.

Приносиме вам сумар медияльной ґрупы ЛЕМ.фм+ на ден 19. марця 2020 р.

Рекомендациі Собору ПАПЦ

В віторок, 17. марця, засідал Святый Собор Єпископів Польской Автокефальной Православной Церкви. Головном темом засіданя была пандемія коронавіруса. На офіцияльным сайті Церкви явил ся комунікат в тій справі. Собор апелює до вірных о одповідальніст і спокій в тых тяжкых хвилях, як тіж о молитву о затриманя епідеміі і здоровля вшыткых хворых та медичного персонелю. Рекомендує додати до єктеніі вчас Божеской Літургіі просьбы з «Молебна вчас морового повітря». Собор зобовязує і духовных отців, жебы допомагали вшыткым потрібуючым. В комунікаті чытаме, што вшыткы богослужыня треба правити згідно з великопістным ґрафіком. Вірным треба рекомендувати, жебы до святых тайн приступували в робочы дни, коли в храмах громадит ся меньше вірных. В церквах повинны быти доступны одповідні гіґієнічны середкы, дезинфекуючы плыны ци хусточкы до перетераня ікон. В найблизшых днях треба ограничыти стрічы в парохіяльных салях. Собор Єпископів Польской Автокефальной Православной Церкви інформує, што лем міцна віра, молитва, шыроко понимана покірніст і покаяня допоможут вірным побороти епідемію.

Уряд Охороны Конкуренциі і Консументів реаґує

Презес Уряду Охороны Конкуренциі і Консументів піднял рішыня покликати ансамбль, якій контролювал буде збільшыня цін ідла і гіґієнічных продуктів. Правіцникы Уряду і Гандльовой Інспекциі будут моніторувати ціны продуктів в інтернеті і традицийных склепах. Як звертат увагу презес Уряду, епідемія то трудный час, але на жаль соспільный непокій єст выкликуваный тіж нечестныма діянями підприємців, котры вводят в блуд, інформуючы, же іх продукты хоронят перед хворотом, або вельократно збільшают ціны. До Уряду Охороны Конкуренциі і Консументів дотерают інформациі, што декотры продукты сут на вельо дорожшы. Головно іджыня і гіґієнічны середкы. Прото тіж покликаный был специяльный ансамбль, котрый провірювал буде тот проблем, жебы неправильны інформациі не были пошырюваны і жебы никому не бракувало основных продуктів. Спілпрацу з Урядом піднял популярный порталь Allegro, завдякы чому повело ся уж выелімінувати бл. 50 тис. оферт продуктів, котры нибы мают протидіяти пошырюваню ся коронавіруса. Уряд быти може і займе ся зміном правных реґуляций в спецуставі, жебы протидіяти такым практикам.

Свидник реаґує на коронавіруса

Місто Свидник в звязку з коронавірусом забезпечат охроронны маскы для своіх жытелів. Перше достают іх тоты найстаршы. Рада Міста єдночасно приготовлює простір для хворых пациєнтів або люди в кварантанні. В окресі Свидник были в остатніх днях потверджены припадкы заінфекуваня новым коронавірусом. Як повіла пріматорка Марцеля Іванчова, заряджаючы Свидником мают намагу реаґувати на ситуацию і робити крокы допереду. Окрем заряджынь, приняли в місті і дальшы крокы. Вшыткы робітникы Уяду Міста отримали, подля слів пріматоркы, охоронны середкы і в місті сут робітниками містецкых служб дезинфекуваны дотыковы поля. Заєдно звертаме увагу – покля што орґанізаторы Русиньского Фестівалю во Свиднику не подали інформациі, же тогорічна едиция подіі буде одкликана. Подля плянів має ся фесіваль одбыти в днях 25.-31. мая 2020 р.

Крениця з проблемами

Неґативны наслідства пандеміі одчуват тіж, а може предовшыткым – туристичный бізнес. Проблем має і єден зо славных курортів на Лемковині – Крениця. Великє чысло жытелів Крениці робит в готелярскій ци ґастрономічній голузи та в санаториях. Не чудує, што вельо осіб старат ся рішынями о ограничыню діяня реставраций, барів, кавярен та комунікатом Нацийонального Фонду Здоровля про стриманя діяльности санаторий. Брак туристів і курортників то брак приходів для Крениці. Єднак тоты, котры зачали лікуваня перед 13. марця, значыт перед розпоряджыньом міністра здоровля, можут продолжати терапію. Більшіст курортників рішыла остати, некотры резиґнуют, боячы ся можливости заразити коронавірусом. В діючых санаториях насилено середкы осторожности: курортникы мусят інформувати про каждый выхід з будинку, при повороті провірят ся ім температуру тіла. Одкликано вшыткы прогулькы. Властителі готелів і реставраций надіют ся, што уж в майовый вікенд туристы вернут до Крениці і ситуация ся унормує. Рахуют тіж на поміч власти Крениці, прим. через обнижыня податку од нерухомости за час, коли не можут фунґувати і сут властиві заперты.