Сумар дня на 11. марця 2020 р.

Приносиме вам сумар медияльной ґрупы ЛЕМ.фм+ на ден 11. марця 2020 р.

В Яслі за утворіньом Центрального Комунікацийного Порту

Радны міста Ясло проголосували становиско підтримуюче ініциятиву польского уряду, што ся тыкат побудуваня Центрального Комунікацийного Порту. Радны звертают єданк увагу на необхідніст продолжыня державной дорогы но 73 Пільзно-Ясло до автострады А4, перебудовы желізниці но 106 Ряшів-Ясло і буводы новой штрекы на одтинку з Ясла до Дембиці. Подібне становиско утримуют тіж інчы самоуряды ясельского реґіону. В підкарпатскым воєвідстві в рамках Центрального Комунікацийного Порту має быти побудуваных 155 км новых желізницьовых леній: Лентовня–Ряшів та Ряшів–Санок. Центральный Комунікаций Порт буде комунікацийным спльотом медже Варшавом а Лодзю, котрый зінтеґрує повітряный, желізницьовый і дороговый транспорты. Його головном частю буде Порт Аеропланів «Солідарніст», одкрытя котрого плянуют на 2027 рік. В склад Центрального Комунікацийного Порту входят тіж желізницьовы інвестициі, якы дадут можливіст іздити медже Варшавом а найбільшыма польскыма містами в часі не долшым як 2,5 год.

Звіданя про меншынову політику до кандидатів на президента Польщы

В звязку з надходячыма президентскыма выборами в Польщы, котры пройдут 10. мая тр., Бернард Ґайда, ведучый Союзу Німецкых Соспільно-Культурных Стоваришынь в Польщы, подал писмо зо звіданями до кандидатів на Президента Польщы. Звідує в ним м.ін. о іх однесіня до вельокультуровости і промуваня меншын ци реакцию на ксенофобічны поставы. Дальша ґрупа звідань тыкат реалізациі постанов поміщеных в ратифікуваных Польщом документах: Рамовій конвенциі о охороні нацийональных меншын та Европейскій карті реґіональных або меншыновых языків. В списку звідань нашол ся тіж вопрос о готовіст до новелізациі закону о меншынах з 2005 рока, ходит особливо о обнижыня порога, якій даст можливіст ввести двоязычны таблиці і язык меншыны в ґмінах, з 20 на 10 процент участи меншыны в соспільности ґміны. Кандидатам на голову державы припоминают тіж, што в буджеті на плеканя культуры 13-ох меншын є 16 млн зл, а меншынова сторона Спільной Комісиі од років без успіху боре ся о збільшыня той квоты. Цілый лист находит ся на сайті союзу: vdg.pl.

Карпаторусиньскій Фільмовый Фестіваль в Пітсбурґу

Всітри документальны фільмы продукциі Фундациі Джона і Гелен Тімо вкажут першыраз в околицях Пітсбурґа. Документы о русиньскій істориі ХХ ст. представлены будут в рамках Карпаторусиньского Фільмового Фестівалю, якій пройде 2. мая на обшыри Медженародного Аеропорту Hyatt Regency в Пітсбурґу. Презентуваны будут фільмы: «Перемінены през Талергоф» – про пробы анігіляциі Русинів в часі І світовой войны, «Аж і слезы не старчыли» – про акцию «Вісла», та «Воскресеніє народа» – про одроджыня русиньской культуры в періоді перед і по падіню берліньского муру. На показах присутны будут і продуцетны фільмів – Мария Сільвестрі та Джон Ріґєтті, а тіж некотры особы, з котрыма нагрывано бесіды до фільмів. Протягом дня, медже показами, заплянувано час на дискусиі та перекускы. Вступне на фестіваль дармо. Орґанізаторами подіі сут Одділіня Полудньово-Західньой Пенсильваніі Стоваришыня Карпаторусинів та Фундация Джона і Гелен Тімо.

«Поділь ся стравом» і в Креници

Якісый час тому інформували сме, што в Польковицях замонтувано социяльну ледівку. Од тыжня подібна ініциятива ведена єст в Креници. Осередок Социяльной Помочы в Креници поінформувал, што 3. марця при ул. Крашевского 37 поставлено социяльну ледівку в рамках акциі «Поділь ся стравом». Ледівка находит ся на партері будинку МПҐК в Креници. Каждый, хто має за вельо продуків, ідла, прошеный єст поділити ся з потрібуючыма. Выміг єст, жебы мало актуальный термін здатности і было докладні запакуване. Не мож лишати суровых яєц, мяса ци буд-чого в одкрытых банках. Ледівку будут дополняти в вітіркы, середы і пятниці.