Сумар дня на 10. марця 2020 р.

Приносиме вам сумар медияльной ґрупы ЛЕМ.фм+ на ден 10. марця 2020 р.

Осередок в Ожынній буде одкрытый уж од початку квітня/апріля

Осередок в Ожынній вкінци буде одкрытый. Офіцийні ремонтовы працы в будинку бывшой Граничной Стражнці, де днес находит ся Осередок Еколоґічной Едукациі, закінчыли ся в жолтни/октобрі минулого рока. Од того моменту ведены были уж лем роботы звязаны з упосажыньом – в меблі, дидактичы материялы і потрібне нарядя. Закінчыня прац плянуване єст на 31. марця, пак уж од початку квітня/апріля зачнут ся варштаты. Кошт інвестициі то близко 3,6 млн зл, в тым 700 тис. з буджету ясельского повіту. Осередок веденый буде Молодіжным Домом Культуры, а в рамках едукацийно-природничой діяльности находят ся м.ін. промуваня проеколоґічных постав, підтримуваня реґіональных традиций і культуровой спадковины.

Карпатскы беркуты уж прилетіли

Беркуты прилетіли до Польщы на початку лютого/фебруара, але не вказуют заінтересуваня розводити ся. Жыючы в польскых Карпатах беркуты того рока токуют слабше як в попередніх. Не вшыткы пары заберают ся будувати і однавляти своі гнізда. Подля специялистів таку ситуацию може спричыняти недостаток ідла. Минулого рока не обродило насіня бука, было мало жолудя і інчого насіня лісовых дерев. А што за тым іде – не розмножыли ся в більшым чыслі грызуны і дрібны звірята, якых ідят м.ін. бекруты. Проблемом єст тіж, же орлы ховают найчастійше лем єдно пташа. В Польщы найбільше беркутів є в підкарпатскым воєвідстві. Гніздує гын 20 пар тых птахів, сім пар в Саноцко-Турчаньскых Горах, по шіст в Низкым Бескіді і Бєщадах, а єдна на Перемышльскым Погірю. В малопольскым воєвідстві по дві пары з гніздами найдено в Сандецкым Бескіді і Ґорцях та по єдній в Пєнінах і Татрах. В Жывєцкым Бескіді однотувано дві пары. Поза Карпатами беркуты гніздуют іщы лем над морьом – в Словіньскым Нацийональным Парку.

В выпадку на схылі Маластівской Маґуры згинул 16-річный Словак

Траґічный выпадок на схылі Маластівской Маґуры. Не жыє 16-річный Словак. Выпадок прошол в неділю, 8. марця, по годині 9 рано на вытягу Ski Park Magura, зараз по його одкрытю. На вікендове ізджыня на лыжах выбрала ся родина зо Словациі. Молодый любитель лыж найправдоподібнійше іхал за скоро і вылетіл з вызначеной трасы, впадаючы з 5-метровой пропасти. Мужчына отримал скору поміч ратунковых служб і в часі першой помочы был свідомый, але з каждом минутом было гірше. До шпыталя был транспортуваный в тяжкым стані. Там тіж вмер. Пресовый офіцер Повітовой Поліциі в Ґорлицях – Ґжеґож Щепанек, вступні поінформувал, же до выпадку не причынили ся інчы особы. Смерт правдоподібно была наслідством многых внутрішніх травм. Прокуратура рішыла забезпечыти тіло мужчыны, жебы пізнійше зробити автопсию.

Презентация збіркы «Анатолий Кралицкій – Творы» остала одкликана

В минулый четвер інформували сме о презентациі новой книжкы під наголовком «Анатолий Кралицкій – Творы» авторства Валерия Падяка і Михала Павлича. Тота найбарже комплетна збірка присвячена творчости Анатолия Кралицкого мала быти вказана 12. марця в Музею Русиньской Культуры в Пряшові. На жаль, в понедільок, 9. марця, на офіцияльным сайті музею вказала ся інформация о одкликаню стрічы. Діяня такы были підняты в цілій Словациі на штонайменше 14 днів проти пошырюваню ся коронавіруса.