Команча жде на беатифікацию кард. С. Вышыньского

Кінцьом минулого рока папа римскій Франциск оголосил дату і місце беатифікациі кардинала Стефана Вышыньского. Подія пройде 7. червця/юнія тр. в Варшаві, але і Команча ся на тото рыхтує – послідній рік свого інтернуваня комуністичныма властями в періоді од 1955 до 1956 рока Примас Тисячлітя провюл в монaстырі сестер назаретанок в Команчы.

Інформацию про термін беатифікациі подал кардинал Казімєж Нич, варшавскій митрополита, в часі бріфінґу 21. жолтня/октобра 2019 р. в Дому Варшавскых Архієпископів. Процес беатифікациі Вышыньского тырвал 30 років. Зачал ся в 1989 році, значыт вісем років по смерти кардинала. Аж папа Франциск принял декрет офіцийні вызнаючый чудо оздоровліня за прошыньом Примаса Тисячлітя.

Команча хоче гідні приняти поломників і туристів

Оздоровліня тыкат 19-літньой дівчыны зо Щеціна, котра в 1988 році захворіла на раковину. Дохторі не давали єй шанс пережыти. Товды ґрупа сестер з монастыря назаретанок в Команчы і інчы зачали молити ся о оздоровліня за прошыньом примаса Вышыньского. Подля документациі в тій справі оздоровліня пришло знагла і вызнали го тырвалым.

До монастыря в Команчы фурт приізджают поломникы і туристы, котры хотят видіти місце інтернуваня примаса. Зорґанізувано в будинку ізбу памяти, котру приходят видіти тисячы люди на рік. Є гын столик, при котрым працувал кардинал, місце, на котрым клячал, але найважнійша памятка то тексты Ясногірской Присягы і Великой Невенны перед Тисячлітьом Хрещыня Польщы авторства кард. Вышыньского.

Того рока з огляду на беатифікацию Вышыньского в монастырі сподівают ся іщы більшого чысла поломників і туристів. В плянах є помалювати і одновити деревяный будинок монастыря, особливі його зовнішню елевацию. Ґміна Команча так само хоче зрыхтувати ся на більше чысло туристів. Плянюют побудувати паркінґ на 50 авт недалеко од монастыря (тот находит ся в лісі). На 20. червця/юнія в самій Команчы заплянувано благодійнны торжества дякуючы за беатифікацию, а скорше, 7. червця/юнія, монашкы з Команчы возмут участ в беатифікациі кард. Вышыньского в Варшаві на пляци Пілсудского.

Кардинал Стефан Вышыньскій (1901-1981)

Примас Вышыньскій выіхал з Команчы до Варшавы 28. жолтня/октобра 1956 рока. Вмер 28. мая 1981 рока, зато каждого місяця монашкы з Команчы молят ся в інтенциі родин.

Стефан Вышыньскій вродил ся в 1901 році. В 1920 р. вступил до духовной семінариі во Влоцлавку. На священника был рукоположеный в 1924 р. Обнял товды вікарият при вроцлавскій катедрі. В роках німецкой окупациі з розказу власти укрывал ся. Вюл конспірацийну освітову акцию, полнил обовязкы капеляна Державной Арміі.

В 1946 р. был менуваный любельскым єпископом, а два рокы пізнійше – архієпископом ґнєзнєньско-варшавскым і примасом Польщы.

Архієпископ Стефан Вышыньскій, од 1953 р. кардинал, остал ведучым Конференциі Єпископату Польщы в моменті, коли власти сталіновской Польщы зачали аґресивну борбу з реліґійом і Костелом. Єй цілю было зробити соспільство атеістичным, м.ін. через выелімінуваня Костела з соспільного жытя та підпорядкуваня го державі, разом з одорваньом од Ватикану. Трирічне інтернуваня (1953-56), котре для кард. Вышыньского было часом терпліня і молитвы, принесло велику духову однову для Костела в Польщы.

Кард. Вышыньскій был ініциятором Великой Новенны 9-річного проґраму моральной одновы польской нациі од 1957 до 1966 рока. Примас брал участ в рыхтуванях до Ватиканьского Собору ІІ та його засіданях. Інавґурувал соборове чуваня в Польщы в інтенциі засіданя.

В вересни/септембрі 1978 рока поіхал з делеґацийом польскых єпископів до Німец, што было реалізацийом польско-німецкого поєднаня і пробачыня.

Примас Вышыньскій вмер в 1981 році по тяжкій хвороті.