Сумар дня на 5. марця 2020 р.

Приносиме вам сумар медияльной ґрупы ЛЕМ.фм+ на ден 5. марця 2020 р.

Перша особа в Польщы заражена коронавірусом

Вчера, 4. марця, по 8.00 год. рано зачала ся пресконференция шефа польского Міністерства Здоровля, Лукаша Шумовского, на котрій представлено актуальный статус борбы з пандемійом коронавіруса. Міністер заявил, што в Польщы єст уж перша особа заражена тым вірусом. Вчас пресконференциі завідуючый ресортом од охороны здоровля оголосил, же першый в Польщы припадок явил ся в любушскым воєвідстві, в Зеленій Горі. Як чули сме в выповіди Шумовского, хворый приіхал з Німец. Вказало ся, же результат баданя на приявніст коронавіруса в його орґанізмі был позитивный, што потвердило першый припадок заражыня в Польщы. Службы охороны здоровля апелюют, жебы не впадати в паніку. Але барз важным єст быти осторожным і тримати гіґієну. Треба часто мыти рукы, ограничыти контакты предовшыткым з тыма особами, котры могли перебывати з людми, будучыма в посліднім часі в загороженых вірусом частях світа, або самы з такых приіхали. Треба тіж позерати на себе, не баґателізуючы ниякых симптомів інфекциі – римы, кашляня, горячкы, а з такыма же признаками піти до дохторя.

Нова лемківска лектура од СЛ

На офіцияльным сайті Стоваришыня Лемків явила ся інформация, што мож придбати «Лемківскій Річник 2019». То шторічне, постійне выдавництво той орґанізациі, котре присячене єст головно ріжным річницям, але і жытю лемківской меншыны в Польщы і на світі. В «Лемківскым Річнику» за 2019 рік явили ся тексты присвячены 30-літю діяльности Стоваришыня Лемків, часопису «Бесіда» і незалежного русиньского руху в Польщы. Як пише во вступі до публикациі головный редактор Севериян Косовскій, 2019 рік был богатый в округлы річниці, святкувано м.ін. 50-літя діяльности ансамблю Лемковина з Білянкы, 80. річницю початку ІІ світовой войны та 200. річницю народжыня Александра Павловича. В «Лемківскым Річнику 2019» нашли ся тексты Андрия Копчы про початкы і діяльніст Стоваришыня Лемків, Петра Трохановского про історию часопису «Бесіда», Ярослава Горощака про участ лемківскых вояків в войні, Петра Медвідя – присвченый Будительови Павловичови, та польскоязычный долгій текст Ярослава Трохановского про історию ансамблю Лемковина. Ціна єдного примірника то лем 10 зл плюс кошты высылкы. Замовліня мож складати на сайті СЛ.

Буде мож чытати Кралицкого

Музей Русиньской Культуры в Пряшові просит 12. марця о 17.00 год. в своі просторы на презентацию новой книжкы присвяченой творчости Анатолия Кралицкого, русиньского писателя, котрый жыл в ХІХ ст., публицисты, історика, етноґрафа, монаха грекокатолицкого чыну св. Василия, ігумена мукачівского монастыря. Збірник зредаґували Валерий Падяк і Михал Павліч. Книжка під наголовком «Анатолій Кралицькый – Творы» то збірка выбраных творів Кралицкого, а тых лишыл він по собі веце як 400. Выданя являт ся найбарже комплетном збірком його твочости – головно прозы, але тіж перекладів, мемуарів, публицистикы і етноґрафічных описів. Кралицкій зачысляный єст до навызначнійшых представників русиньской літературы періоду возроджыня XIX ст.

Нова «Бесіда» доступна

На конец днешніх новин інформация про іщы єдно постійне выданя Стоваришыня Лемків. Мож уж чытати найновше чысло найстаршого, повоєнного лемківского часопису в Польщы «Бесіда» за місяці січен/януар – лютый/фебруар 2020 р. В номері м.ін. статі Богдана Ґамбаля про Ден Русинів на Лемковині ци Ольгы Пелехач про лемківскє колядуваня, котре проходило в січни/януарі в Ґорлицкым Центрі Культуры. На дальшых странах сут тексты Наталиі Малецкой-Новак про діяня Омбудсмана Адама Боднара в обшыри охороны прав нацийональных і етнічных меншын. Андрий Ковальскій пише про ХІІІ Стрічы Трьох Поколінь з Лемківском Культуром в Пшемкові, а Андрий Копча о ХХVII Стрічах з Лемківском Культуром в Ґожові Великопольскым. Петро Трохановскій презентує статю про річницю народжыня збійника Андрия Савкы. В «Бесіді» находит ся і текст Северияня Косовского присяченый 80. річници народжыня Маестра Ярослава Трохановского. В части з «Выдавничой поличкы» єст інформация о новій книжці «Драмы» Андрия Копчы. Заохочаме чытати.